पुण्याच्या उपबाजारात भाजीपाला आवक सुरळीत

पुणे ः ‘कोरोना’ लॉकडाऊनमध्ये शहरातील रुग्णांची संख्या वाढल्यामुळे बाजार समिती बंदचा परिणाम शेतकऱ्यांच्या नुकसानीसह शहरातील भाजीपाला टंचाईवर झाला होता. या पार्श्वभूमीवर बाजार समितीचे उपबाजार गुरुवार (ता. १६) पासून सुरू झाले आहेत. चार उपबाजारांमध्ये २४६ लहान मोठ्या वाहनांमधून सुमारे साडेपाच हजार क्विंटल भाजीपाल्याची आवक झाल्याची माहिती प्रशासक बी. जे. देशमुख यांनी दिली. तर अक्षय्य तृतीयेला आंबा उपलब्ध होण्यासाठीच्या उपाययोजना सुरू असल्याचेही त्यांनी सांगितले.

श्री. देशमुख म्हणाले, ‘‘मुख्य बाजार आवार हॉटस्पॉटमध्ये असल्याने बंद आहे. मात्र, उपबाजार सुरू करण्याची भूमिका प्रशासनाने घेतली. गुरूवारी मोशी, मांजरी खडकी आणि उत्तमनगर उपबाजारात २४८ वाहनांमधून ५ हजार ५०० क्विंटल आवक झाली होती. तर भुसार विभाग बुधवार (ता. १५) पासून सुरळीत सुरू झाला असून, शहरातील अन्नधान्य, कडधान्य, फळे भाजीपाल्याचा पुरवठा सुरळीत होण्यास मदत होणार आहे.’’ 

दरम्यान अक्षय्य तृतीयेला शहरातील नागरिकांना आंबा मुबलक उपलब्ध करण्यासाठी देखील प्रयत्न सुरू असून गुलटेकडी हा हॉटस्पॉट पासून आंबा बाजार तात्पूरता स्थलांतर करण्याचे विचाराधीन आहे. यासाठी म्हात्रे पुलाजवळील डिपी रस्त्यालगत असणाऱ्या मंगल कार्यालयांमध्ये व्यापार स्थलांतरासाठी मंगल कार्यालयांचे मालक आणि आंबा व्यापारी यांच्याशी चर्चा सुरू आहे.