परभणी : लॉकडाउनच्या काळात ‘सोशल डिस्टन्सिंग’चे पालन व्हावे, यासाठी महानगरपालिकेतर्फे भाजीपाला, फळे विक्रेत्यांना शहरातील २० ते २५ ठिकाणी खुल्या मैदानावर जागा दिली आहे. प्रत्येक विक्रेत्यास १५ ते २० फुट जागा मार्किंग करुन दिल्या आहेत. त्यामुळे सुमारे ५१० शेतकरी- विक्रेत्यांची भाजीपाला, फळे विक्रीची सोय झाली आहे, असे सूत्रांनी सांगितले.
‘कोरोना’चा प्रादुर्भाव रोखण्यासाठी प्रतिबंधात्मक उपाययोजनांतर्गंत महानगरपालिकेचे आयुक्त रमेश पवार यांच्या सूचनेनुसार सहाय्यक आयुक्त आणि स्वच्छता निरीक्षकांनी शेतकऱ्यांना, अन्य विक्रेत्यांना भाजीपाला, फळे विक्रीसाठी शहरात जागा दिल्या आहेत. त्याच ठिकाणी भाजीपाला- फळे विक्री करण्याच्या सूचना दिल्या आहेत.
शहरातील गणपती चौक, पारदेश्वर मंदीर, विद्यानगर, शालीमार फंक्शन हॉलजवळ, जामनाका, जुना मोंढा, सिटी पोलीस चौकीजवळ, गांधीपार्क, आर. आर. टॉवर, क्रांती चौक, गंगाखेड नाका, गव्हाणे चौक, उघडा महादेव मंदिराच्या बाजूस, लोकमान्य नगर, येलदरकर कॉलनी, कल्याण नगर, राजेंद्र गिरी नगर,कृष्णा गार्डनच्या बाजूची मोकळी जाग, जागृती कॉलनी, शिवाजी नगर आदी ठिकाणे त्यात आहेत. जवळपास ५१० पेक्षा जास्त विक्रेत्यांची व्यवस्था करण्यात आली आहे. त्यावर नियंत्रण ठेवण्यासाठी कर्मचाऱ्यांचीही व्यवस्था करण्यात आली आहे.
भाजीपाला-फळे विक्रेत्यांनी तोंडाला मास्क व रुमाल बांधूनच विक्री करावी, अशा सूचना दिल्या आहेत. नागरिकांनी अत्यावश्यक कारणाशिवाय घराबाहेर पडू नये. वैयक्तिक अंतर ठेवावे. मास्कचा वापर करावा. फळे, भाजीपाला घरी गेल्यानंतर मिठाच्या पाण्याने स्वच्छ धुऊन घ्यावा, असे आवाहन पवार यांनी केले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.