मुंबईत भाजीपाला, कांदा, बटाटा बाजार पूर्ववत

मुंबई : कोरोनाच्या धास्तीमुळे बंद राहिलेले मुंबई कृषी उत्पन्न बाजार समितीतील भाजीपाला आणि कांदा बटाटा बाजार बुधवारपासून (ता.१५) पुन्हा सुरू झाले आहेत. काल बाजार आवारात सुमारे सहाशे वाहने भाजीपाला आणि कांदा बटाटा आला आहे. तर सुमारे चारशे वाहने थेट मुंबईत गेल्याचे बाजार समितीचे प्रशासक व सचिव अनिल चव्हाण यांनी सांगितले.  सकाळ-ॲग्रोवन मुंबई-पुणे सारख्या बाजार समित्या बंद असल्यामुळे होणाऱ्या नुकसानीचा विषय सातत्याने मांडल्यानंतर अखेर बुधवारपासून मुंबई बाजार समितीत व्यवहार सुरू झाले. दरम्यान, कोरोनाला प्रतिबंध करण्यासाठी बाजार समिती प्रशासनाकडून विविध उपाययोजना राबविल्या जात असून बाजार आवारात सामाजिक अंतर राखले जावे यासाठी पोलीस प्रशासनाकडून ड्रोन कॅमेऱ्याचा वापर केला जात आहे.  सध्याच्या लॉकडाऊनच्या काळात मुंबई आणि परिसरात जीवनावश्यक वस्तूंचा पुरवठा सुरळीत व्हावा यासाठी मुंबई कृषी उत्पन्न बाजार समितीने कांदा-बटाटा आणि भाजीपाला बाजार कालपासून पुन्हा सुरू केले आहेत. बुधवारी पहिल्याच दिवशी बाजार समितीत भाजीपाला आणि कांदा बटाटा या शेतमालाची सुमारे सहाशे वाहने आली आहेत. तर विविध चेक नाक्यावरुन सुमारे चारशे वाहने मुंबई शहरात थेटपणे पाठवण्यात आली आहेत. यात ट्रक आणि टेम्पो अशा वाहनांचा समावेश आहे.  तसेच बाजार आवारात सामाजिक अंतर राखले जावे यासाठी पोलीस प्रशासनाकडून ड्रोन कॅमेऱ्याचा वापर केला जात आहे. बाजार समिती सुमारे आठशे एकरवर पसरली आहे, त्यामुळे पोलिसांनी ड्रोनच्या साहाय्याने परिस्थितीवर लक्ष ठेवले जात आहे. तसेच सामाजिक अंतर न पाळणाऱ्यांवर गुन्हे दाखल केले जात आहेत. फळबाजार बंदच बाजार समितीत अजूनही फळं बाजार, अन्नधान्य व मसाला बाजार बंदच आहेत. हे बाजार आवार लवकर सुरू करण्यासाठी समिती प्रशासन प्रयत्नशील असल्याचे सांगण्यात आले आहे.