‘निसर्ग’च्या नुकसानग्रस्तांना शासनातर्फे लवकरच मदत : भुजबळ

नाशिक : निसर्ग चक्रीवादळामुळे राज्यासह जिल्ह्याला फटका बसला आहे. नुकसानग्रस्तांना शासनाकडून लवकरच मदत दिली जाईल, असे आश्‍वासन पालकमंत्री छगन भुजबळ यांनी दिले. 

भुजबळ यांनी येवला तालुक्यात नुकसानीची पाहणी केली. निसर्ग चक्रीवादळामुळे अंदरसुल आणि धामणगाव परिसरात नुकसान झाले आहे. येवला तहसिल कार्यालय येथे निसर्ग चक्रीवादळ नुकसान, खरीप आढावा व कोरोनाच्या पार्श्वभूमीवर भुजबळ यांनी संबंधित अधिकाऱ्यांची बैठक घेतली. यावेळी उपविभागीय अधिकारी सोपान कासार, तहसिलदार रोहिदास वारुळे, पोलीस उपअधीक्षक समरसिंग साळवे, गटविकास अधिकारी उमेश देशमुख, येवला नगरपालिकेच्या मुख्याधिकारी संगीता नांदूरकर, वैद्यकीय अधीक्षक डॉ. शैलजा कृपास्वामी, तालुका आरोग्य अधिकारी डॉ. एच. आर.गायकवाड आदी उपस्थित होते. 

चक्रीवादळामुळे झालेल्या नुकसानीचे तातडीने पंचनामे करून शासनास अहवाल देण्याचे आदेश भुजबळ यांनी अधिकाऱ्यांना दिले. तसेच येवला शहर व तालुक्यात असलेल्या कोरोना रुग्णांचा आढावा घेतला. तालुक्यातील खरीप हंगामाबाबत आढावा घेऊन त्याची सद्यस्थिती, शेतकऱ्यांना देण्यात येणारे पीक कर्जवाटप, बियाणांची उपलब्धता व पुरवठ्याबाबत नियोजन, खतांची उपलब्धता व पुरवठा, या बाबत नियोजन, सिंचनासाठी पाणी, आरक्षणाचे नियोजन, पाणी टंचाईबाबत केल्या जाणाऱ्या उपाययोजनांचा आढावा भुजबळ यांनी घेतला.