Agriculture News in Marathi In Vidarbha, soybean sprouts | Agrowon

विदर्भात सोयाबीनला फुटले कोंब 

टीम अॅग्रोवन
गुरुवार, 23 सप्टेंबर 2021

संततधार तसेच काही भागांत झालेल्या अतिवृष्टीमुळे काढणीला आलेल्या सोयाबीन पिकाला मोठा फटका बसला आहे. भिवापूर तालुक्यात २४ तासांत १२४ मिलिमीटर पावसाची नोंद झाली.

नागपूर : संततधार तसेच काही भागांत झालेल्या अतिवृष्टीमुळे काढणीला आलेल्या सोयाबीन पिकाला मोठा फटका बसला आहे. भिवापूर तालुक्यात २४ तासांत १२४ मिलिमीटर पावसाची नोंद झाली. त्यामुळे या भागातील सोयाबीनला अक्षरशः कोंब फुटल्याची माहिती शेतकऱ्यांनी दिली. वर्धा, यवतमाळ जिल्ह्यांत कापसाची बोंडसड मोठ्या प्रमाणावर झाली आहे. 

नागपूर जिल्ह्यात गेल्या काही वर्षांत सोयाबीनच्या लागवड क्षेत्रात वाढ नोंदविण्यात आली आहे. सोयाबीनला इतर पिकांच्या तुलनेत मिळणारा वाढीव दर हे त्यामागील कारण सांगितले जाते. या वर्षी सुमारे ९२ हजार हेक्‍टरवर सोयाबीनची लागवड करण्यात आल्याची माहिती कृषी विभागाच्या सूत्रांनी दिली.

वातावरणदेखील पोषक मिळाल्याने या वर्षी सोयाबीनचे बंपर उत्पादन होण्याचा अंदाज वर्तविला जात होता. मात्र गेल्या पंधरवड्यापासून विदर्भात सर्वदूर पावसाची संततधार सुरू आहे. सोमवारी (ता. २०) मध्यरात्री तर पावसाने कहरच केला. मध्यरात्रीपासून मंगळवारपर्यंत २४ तासांत १२४ मिलिमीटर पाऊस धो-धो कोसळला. अनेक गावांमध्ये नदी-नाल्यांचे पाणी शिरले. तीन फुटांपर्यंत पाणी साचून होते. शेतशिवाराची परिस्थितीदेखील यापेक्षा वेगळी नव्हती. चिखलापार गावात पावसामुळे सोयाबीन पाण्यात राहिले परिणामी काळवंडले आहे. 

ऐन काढणीच्यावेळी हा आघात झाल्याने काही शेतकऱ्यांना काहीच उत्पादन होणार नाही अशी भीती आहे. त्यासोबतच पीक काळवंडल्याने त्याला अपेक्षित दर मिळणार नाही, अशी स्थिती आहे. अकोला, यवतमाळ जिल्ह्यात देखील कापसाचे पीक पाण्याखाली आल्याने बुरशीजन्य रोग वाढून बोंडसडचा प्रादुर्भाव झाला आहे. 

पावसात बुडाले पीक 
नागपूर, वर्धा, यवतमाळ, अकोला, अमरावती, वाशीम, बुलडाणा या जिल्ह्यांमध्ये देखील संततधार पावसामुळे सोयाबीनला फटका बसला आहे. या सर्व जिल्ह्यांत पीक काढणीस आले असताना पावसाने पुन्हा पावसाने दगा दिल्याने शेतकरी अडचणीत आले आहेत. काही भागांत पावसामुळे शेतात काढणीसाठी जाणेदेखील शक्य होत नसल्याचे शेतकऱ्यांनी सांगितले. 

कापसाची बोंडसड 
वर्धा जिल्ह्यात कापसाची बोंडसड झाली आहे. कापसाचे पीक सतत पावसात राहिल्याने बुरशीजन्य रोगांचा प्रादुर्भाव वाढीस लागला आहे. त्यामुळे कापसाची मोठ्या प्रमाणावर बोंडसड झाल्याची माहिती कृषी विभागाने दिली. कापूस उत्पादक गेल्या वर्षीच्या हंगामात बोंडआळीमुळे जेरीस आले होते. बोंड अळीचा प्रादुर्भाव कमी होत नसल्याने शेतकऱ्यांना पीक काढून टाकावे लागले होते. यावर्षी काही भागात बोंडआळी सोबतच बोंडसडचा प्रादुर्भाव दिसू लागला आहे. परिणामी कापसाचे उत्पादकता प्रभावित होण्याची शक्यता वर्तवली जात आहे.

वर्धा जिल्ह्यात सुमारे दोन लाख १२ हजार हेक्टरवर कापसाची लागवड आहे. त्यासोबतच एक लाख ३९ हजार हेक्टरवर सोयाबीनची लागवड करण्यात आली आहे. हे पीक काढणीच्या अवस्थेत असताना पावसाने पिच्छा पुरविला आहे. परिणामी, सोयाबीन काळवंडले असून काही भागांत सोयाबीनला कोंब फुटले आहेत. विभागीय कृषी सहसंचालक रवींद्र भोसले यांनी दिलेल्या माहितीनुसार नागपूर आणि वर्धा जिल्ह्यात नुकसान अधिक आहे.

त्या पार्श्‍वभूमीवर सर्वेक्षण आणि पंचनाम्याचे आदेश देण्यात आले आहेत. दरम्यान राज्याचे पशुसंवर्धन व दुग्धविकास मंत्री तसेच वर्धा जिल्ह्याचे पालकमंत्री सुनील केदार यांनी देखील पावसामुळे झालेल्या नुकसानीची बाब गांभीर्याने घेत शुक्रवारी (ता. २४) प्रशासनाची आढावा बैठक बोलविली आहे. याच बैठकीत जिल्ह्यातील नुकसानीचे सर्वेक्षण आणि पंचनाम्याचे आदेश होण्याची शक्यता वर्तविली जात आहे. 

सर्वेक्षणानंतर कळणार नुकसानीची आकडेवारी 
अमरावती विभागातील अकोला, वाशीम, बुलडाणा, अमरावती, यवतमाळ या पाच जिल्ह्यांमध्ये सुमारे १४ लाख हेक्‍टरवर सोयाबीनची लागवड आहे. त्यासोबतच दहा लाख १६ हजार हेक्‍टरवर कापूस असल्याची माहिती विभागीय कृषी सहसंचालक शंकर तोटावार यांनी दिली. या जिल्ह्यांमधील नुकसानीबाबत सर्वेक्षण आणि पंचनाम्या नंतरच सांगता येईल, असे ते म्हणाले. 
 


इतर बातम्या
कृषी विकासाचे भगीरथ ठरलेल्या...पुणे : कष्टकरी शेतकऱ्यांच्या मनगटाला बारा...
राज्यात ‘ऑक्टोबर हीट’चा प्रभावपुणे : राज्याच्या तापमानात चढ-उतार सुरूच आहेत....
‘दूधगंगा वेदगंगा’ एकरकमी ३०५६ रुपये...कोल्हापूर : ‘‘बिद्री (ता. कागल) येथील श्री...
वऱ्हाडात सोयाबीनची बाजारात हजारो...अकोला ः वऱ्हाडातील सर्वच बाजार समित्यांमध्ये...
भाजपतर्फे एक नोव्हेंबरला काळ्या फिती...परभणी : मराठवाडा, विदर्भातील अतिवृष्टिग्रस्त...
नाशिक :कांदा व्यापाऱ्यांवर आयकर...नाशिक : जिल्ह्यात कांदा विक्रीसाठी आघाडीवर...
उसाच्या तोडणीला कोल्हापुरात सुरुवातकोल्हापूर: जिल्ह्यातील साखर कारखान्यांचा गळीत...
गुजरातमधून गुळाला मागणी वाढलीकोल्हापूर : यंदा गुजरातमधून गुळाला मागणी वाढत आहे...
नांदेडमध्ये ‘रयत क्रांती’कडून शासन...नांदेड : रयत क्रांती संघटनेच्या वतीने आमदार...
अनिश्‍चित काळासाठी रस्ते अडविता येणार...नवी दिल्ली ः आंदोलन करण्याचा शेतकऱ्यांना अधिकार...
हिरापुरात कापसाची पाण्यातच वेचणीपारोळा, जि. जळगाव : खरीप हंगामाच्या वेळी पावसाने...
मालेगाव तालुक्यात ऊस जळून खाककळवाडी, ता. मालेगाव : तालुक्यातील नरडाणे...
पुणे जिल्ह्यात रब्बीचे अडीच लाख हेक्टर...पुणे  ः ‘‘सध्या रब्बी हंगाम सुरू झाला आहे....
नुकसानग्रस्त शेतकऱ्यांनी...वाशीम : जिल्ह्यात २६ व २७ सप्टेंबर आणि २ व १७...
नांदेड जिल्ह्यात पीकविमा भरपाईची...नांदेड : अतिवृष्टीमुळे पूरस्थिती उद्‌भवून सहा लाख...
निर्यात पडतळमुळे सोयाबीन दराला आधारपुणे : देशात सोयापेंडचे दर अधिक होते त्यामुळे...
राज्याच्या तापमानात चढ-उतारपुणे : राज्यात पावसाने उघडीप दिल्यानंतर तापमानात...
हडपलेला शेतकरीवाटा जमा करण्यासाठी नोटिसापुणे ः राज्यात शेती अवजारे न वाटताच कोट्यवधी...
शेतकरी आंदोलक नव्या रणनीतीच्या तयारीतनवी दिल्ली : तीन कृषी कायद्यांविरोधातील १०...
बुलडाण्यात ८९ हजार हेक्टर बाधितबुलडाणा : जिल्ह्यात गेल्या आठवड्यात तीन दिवस...