खानदेशात ३३५ गावांमधील शेतकऱ्यांना भरपाईची प्रतिक्षा

जळगाव : धुळे आणि जळगाव जिल्ह्यात मंगळवारी (ता.३१) झालेल्या पूर्वमोसमी पाऊस व गारपिटीमुळे धुळे जिल्ह्यातील सुमारे ३५ तर जळगाव जिल्ह्यातील २९४ गावांमध्ये पिकांचे मोठे नुकसान झाले आहे. जळगाव जिल्ह्यातील ३० हजार २६० हेक्‍टरवरील पिकांचे तर धुळ्यातही सुमारे १० हजार हेक्‍टर क्षेत्रावरील पिकांना फटका बसला आहे. प्रशासनाने पंचनामे पूर्ण केले असून, शेतकऱ्यांना भरपाईची प्रतीक्षा आहे. 

जळगाव जिल्ह्यात चोपडा तालुक्‍यात सर्वाधिक १६ हजार २० हेक्‍टरवरील पिकांना फटका बसला आहे. जिल्ह्यात एकूण २९४ गावातील ३१ हजार ११७ शेतकऱ्यांच्या तोंडचा घास गारपिटीने हिरावला आहे. सुमारे ११० कोटींवर नुकसान झाल्याचा अंदाज यापूर्वी व्यक्त झाला होता. शिरपुरात पिकांचे सर्व नुकसान ३३ टक्‍क्‍यांच्यावर आहे. या नुकसानीचा अहवाल कृषी विभागाने जिल्हाधिकाऱ्यांकडे दिला आहे.

रब्बी ज्वारी, गहू, मका, बाजरी, हरभरा, कांदा, केळी, भाजीपाला, फळपिके व इतर पिकांना मोठा फटका बसला. सर्वाधिक सात हजार १०० हेक्‍टरवरील मक्‍याचे नुकसान झाले आहे. त्या खालोखाल सहा हजार ७७७ हेक्‍टरवरील गव्हाचे, तर पाच हजार ८७० हेक्‍टरवरील केळीला फटका बसला आहे. 

चोपडा तालुक्‍यातील ९२ गावांमधील २० हजार ६९१ शेतकऱ्यांच्या ३८३२ हेक्‍टरवरील गव्हाचे नुकसान झाले आहे. ३ हजार ७८७ हेक्‍टरवरील मकाही भुईसपाट झाला. अशाच प्रकारे २ हजार ८८ हेक्‍टरवरील केळी, २ हजार ७६ हेक्‍टरवरील हरभरा, २ हजार ७२ हेक्‍टरवरील रब्बी ज्वारीचे नुकसान झाले आहे.

या सोबतच इतरही पिकांचे नुकसान झाले आहे. जळगाव तालुक्‍यातील ३३ गावांमध्ये ३ हजार ४५२ शेतकऱ्यांचे ७ हजार ८२६ हेक्‍टरवर तर अमळनेर तालुक्‍यातील ४४ गावांमध्ये ४ हजार ६१३ शेतकऱ्यांचे ३ हजार ५८९.९१ हेक्‍टरवरील पिकांचे नुकसान झाले आहे.

शिरपुरात पपई, गहू, केळी, मका, बाजरी, हरभरा या पिकांची मोठी हानी झाली आहे. भरपाईबाबत सरकारने कार्यवाही करून मदतनिधी द्यावा, अशी मागणी शेतकरी छगन पाटील (शिरपूर), रामसिंग पाटील (चोपडा) यांनी केली आहे.