शेटफळगढे, जि. पुणे : जिल्ह्यातील मार्च ते मे २०१८ यादरम्यान मुदत संपणाऱ्या ग्रामपंचायतींच्या सार्वत्रिक निवडणुकीसाठी राज्य निवडणूक आयोगाने प्रभागरचना व आरक्षणाचा कार्यक्रम जाहीर केला आहे. याबाबतची सर्व प्रक्रिया पूर्ण करून येत्या ३ जानेवारी २०१८ पर्यंत जिल्हाधिकाऱ्यांच्या वतीने प्रभागरचना व आरक्षणाला अंतिम मान्यता दिली जाणार आहे.
राज्य निवडणूक आयोगाने डिसेंबर २०१७ अखेर मुदत संपणाऱ्या ग्रामपंचायतींच्या निवडणूक प्रक्रिया ऑक्‍टोबरमध्येच पूर्ण केली होती. यानंतर जिल्ह्यासह राज्यातील फेब्रुवारी २०१८ अखेर मुदत संपत असलेल्या ग्रामपंचायतींसाठी मतदार याद्या अंतिम करण्याचा कार्यक्रम सध्या हाती घेतला आहे. जिल्ह्यातील मार्च ते मे २०१८ यादरम्यान मुदत संपणाऱ्या ग्रामपंचायत निवडणुकीच्या पूर्वतयारीला सुरवात केली आहे. याचाच एक भाग म्हणून ६ नोव्हेंबरच्या आदेशानुसार प्रभागरचना व आरक्षणाचा कार्यक्रम आयोगाने जाहीर केला आहे. याबाबतची अंमलबजावणी करण्याची जबाबदारी जिल्हाधिकारी व तहसीलदारांना देण्यात आली आहे.
निवडणुका होत असलेल्या गावांची येत्या २० नोव्हेंबरपर्यंत तहसीलदारांच्या वतीने प्रारूप प्रभागरचना जाहीर केली जाणार आहे. २८ नोव्हेंबरपर्यंत विशेष ग्रामसभा बोलावून प्रभागरचना जाहीर केली जाणार आहे. तसेच प्रभागनिहाय आरक्षण काढले जाणार आहे. याबाबतची मांडणी करून ४ डिसेंबरपर्यंत जिल्हाधिकारी कार्यालयाच्या वतीने त्याची तपासणी केली जाणार आहे. यात काही दुरुस्ती असल्यास तसा आदेश दिला जाणार आहे.
त्यानंतर ६ डिसेंबरपर्यंत या संदर्भात जिल्हाधिकाऱ्यांच्या अध्यक्षतेखालील सर्व समिती सदस्यांच्या स्वाक्षऱ्या त्यावर केल्या जाणार आहेत. त्यानंतर नागरिकांच्या हरकती, सूचना मागविण्यासाठी तहसीलदारांच्या वतीने प्रभागरचना व आरक्षण यांची ८ डिसेंबरपर्यंत गावोगावी प्रसिद्धी केली जाणार आहेत. त्यावर नागरिकांना १५ डिसेंबरपर्यंत तहसीलदारांकडे लेखी स्वरूपात हरकती दाखल करता येणार आहेत.
तहसीलदारांकडे प्राप्त झालेल्या सर्व हरकती व सूचना सुनावणीसाठी १८ डिसेंबरपर्यंत उपविभागीय अधिकाऱ्यांकडे पाठविल्या जाणार आहेत. या हरकतींवर २७ डिसेंबपर्यंत सुनावणी होणार आहे. प्रत्येक हरकती व सूचनांवर सुनावणीनंतर अभिप्रायासह प्रस्ताव अंतिम निर्णयासाठी जिल्हाधिकारी कार्यालयाकडे सादर केला जाणार आहे. यानंतर ३ जानेवारीपर्यंत जिल्हाधिकाऱ्यांच्या वतीने प्रभागरचना व आरक्षणाला अंतिम मान्यता दिली जाणार आहे.
या अंतिम मान्यतेनंतर प्रभागरचना व आरक्षणाला ८ जानेवारीला प्रसिद्धी दिली जाणार आहे. प्रभागरचनेत निश्‍चित केलेल्या सीमानुसार गावच्या मतदार याद्या अंतिम करण्याचा कार्यक्रम जानेवारी अखेरपर्यंत जाहीर केला जाणार आहे.
