संस्कृती जपण्याचे काम वारकरी संप्रदायाने केले ः मंत्री रावते

सोलापूर : संतांचे व वारकऱ्यांचे माहेरघर असलेल्या पंढरीत एसटी महामंडळाच्या वतीने ३३ कोटी रुपये खर्चून भव्य असे यात्री निवास व सुसज्ज बसस्थानक बांधण्यात येणार आहे. वारकरी संप्रदायाच्या प्रथा, परंपरेला शोभेल असे हे यात्री निवास असेल. खऱ्या अर्थाने महाराष्ट्राचे संस्कार, संस्कृती जपण्याचे काम वारकरी संप्रदायाने केले आहे, असे मत परिवहनमंत्री तथा एसटी महामंडळाचे अध्यक्ष दिवाकर रावते यांनी रविवारी (ता. ३) पंढरपुरात व्यक्त केले.

एसटी महामंडळाच्या वतीने बांधण्यात येणाऱ्या यात्री निवास व बसस्थानकाचा भूमिपूजन सोहळा संत नामदेवांचे वंशज ह.भ.प. माधव महाराज नामदास, संत एकनाथांचे वंशज ह.भ.प. रावसाहेब गोसावी महाराज आणि संत तुकारामांचे वंशज ह.भ.प. संजय महाराज देहूकर यांच्या हस्ते करण्यात आला. या सोहळ्याप्रसंगी ते बोलत होते. 

या कार्यक्रमास माजी आमदार सुधाकरपंत परिचारक, एसटी महामंडळाचे उपाध्यक्ष रणजितसिंह देओल, एसटी महामंडळाचे महाव्यवस्थापक प्रतापसिंह सावंत, मुख्यमंत्री कार्यालयाचे विशेष कार्यअधिकारी श्रीकांत भारती, उपमहाव्यस्थापक राहुल तोरो, सुहास जाधव, विभाग नियंत्रक रमाकांत गायकवाड, तसेच महाराज मंडळी उपस्थित होती.

या वेळी संत नामदेवांचे वंशज ह.भ.प. माधव महाराज नामदास, संत एकनाथांचे वंशज ह.भ.प. रावसाहेब गोसावी महाराज आणि संत तुकारामांचे वंशज ह.भ.प. संजय महाराज देहूकर आदी महाराज मंडळींचा सत्कार करण्यात आला. या कार्यक्रमास मंदिर समितीचे सदस्य ज्ञानेश्वर महाराज जळगांवकर, महादेव महाराज शिवणीकर, तनपुरे महाराज आदी महाराज मंडळी यांच्यासह राज्याच्या विविध भागांतून आलेले भाविक मोठ्या संख्येने उपस्थित होते.