उत्तर कोकण, उत्तर महाराष्ट्रात जोरदार पावसाचा इशारा 

पुणे : अरबी समुद्रात तयार होत असलेल्या कमी दाब क्षेत्रामुळे राज्यात पावसाला पोषक हवामान झाले आहे. आज (ता. १) उत्तर कोकणातील पालघर, उत्तर महाराष्ट्रातील नाशिक, नंदूरबार, धुळे जिल्ह्यात जोरदार पावसाचा इशारा देण्यात आला आहे. तर कोकण, मध्य महाराष्ट्र, मराठवाड्यात विजांसह पावसाची शक्यता आहे. विदर्भात मुख्यतः कोरड्या हवामानाचा अंदाज हवामान विभागाने वर्तविला आहे. 

राज्यात गारठा वाढला असतानाच ढगाळ हवामानामुळे किमान तापमानात चढ-उतार सुरू आहे. अनेक ठिकाणी किमान तापमानाचा पारा १५ अंशांच्या पुढे गेला आहे. मंगळवारी (ता. ३०) गोंदिया येथे नीचांकी १०.९ अंश सेल्सिअस तापमान नोंदले गेले. तर सकाळपर्यंतच्या २४ तासांमध्ये अलिबाग येथे उच्चांकी ३४.४ अंश सल्सिअस तापमान नोंदले गेले. 

मंगळवारी (ता. ३०) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअस मध्ये) :  पुणे २८.१ (१६.६), जळगाव २९.९ (१७), कोल्हापूर २६.५ (२०.७), महाबळेश्‍वर २१.८(१५.५), मालेगाव २८.२ (१४.३), नाशिक २७.६ (१६.२), निफाड २९.३ (१७.२), सांगली २७.४ (२१.४), सातारा २६.२ (२१.३), सोलापूर २९ (१८.१), सांताक्रूझ ३४ (२३.८), अलिबाग ३४.४ (-), डहाणू ३३.७ (२१.४), रत्नागिरी ३४.१ (२६), औरंगाबाद २८.२ (१८), नांदेड ३२.४ (१९.२), उस्मानाबाद - (१६.४), परभणी २७.६ (१८.९), अकोला ३१.४ (१८.६), अमरावती ३०.२ (१५), ब्रह्मपुरी ३२.१ (१५.२), बुलडाणा २८.५ (१६.५), चंद्रपूर २९.४ (१७.६), गडचिरोली २९ (१५), गोंदिया २८.८ (१०.९), नागपूर ३०.२ (१२.५), वर्धा २९.८ (१५), वाशीम ३१.५ (१५), यवतमाळ ३०.५ (१५).   

बंगालच्या उपसागरात चक्रीवादळाचे संकेत  बंगालच्या उपसागरात दक्षिण थायलंड जवळ हवेचे कमी दाबाचे क्षेत्र तयार झाले आहे. हे कमी दाबाचे क्षेत्र अंदमान समुद्राकडे सरकत आहे. ही प्रणाली वायव्येकडे सरकून भारताच्या पूर्व किनारपट्टीकडे येताना तीव्र होऊन बंगालच्या उपसागरात शुक्रवारपर्यंत (ता. ३) चक्रीवादळ तयार होण्याचे संकेत आहेत. हे संभाव्य चक्रीवादळ आंध्र प्रदेश ओडिशाच्या किनाऱ्याकडे येण्याची शक्यता आहे. दरम्यान, अरबी समुद्रात लक्षद्वीप बेटांजवळ चक्राकार वाऱ्यांची स्थिती आहे. या वाऱ्यांच्या प्रभावांमुळे महाराष्ट्राच्या किनाऱ्यालगतच्या समुद्रात आज (ता.१) कमी दाबाचे क्षेत्र तयार होण्याची शक्यता वर्तविण्यात आली आहे.