नगर जिल्ह्यातील धरणांमध्ये पाण्याची आवक घटली 

नगर  ः जिल्ह्यात अजूनही पाऊस झालेला नाही. मात्र अकोले तालुक्यातील पश्चिम भागात सुरू असलेल्या पावसावर धरणे भरली आहेत. दोन दिवसांपासून अकोले भागातही पावसाचा जोर कमी झाल्याने धरणांमध्ये होणारी पाण्याची आवक कमी झाल्याने मुळा, भंडारदरा, निळवंडे धरणातून पाण्याचा विसर्ग कमी केला आहे. 

अकोले तालुक्याचा पश्चिम भाग वगळता अन्य भागांत मात्र अजूनही पुरेसा पाऊस नसल्याने शेतकरी हतबल आहेत. मात्र नाशिकमधील पावसामुळे कोपरगाव, नेवासे, श्रीरामपूर तालुक्यात प्रवरा नदीमुळे राहाता तालुक्यात, मुळा नदीमुळे राहुरी तालुक्यात, कुकडीमुळे पारनेर; तर भीमा नदीमुळे श्रीगोंदा, कर्जत तालुक्याच्या काही भागांत पूरस्थिती निर्माण झाली होती. विशेष असे की जिल्ह्यातील अकोले तालुक्याचा काही भाग वगळला तर अन्य कोणत्याही भागात पाऊस नसतानाही जिल्हा पुराची परिस्थिती अनुभवत होता.

अकोल्यातील पावसावरच भंडारदरा, निळवंडे, मुळा प्रकल्प भरले असून दक्षिणेला मोठा दिलासा मिळाला. जिल्ह्यामध्ये सर्वात मोठा असलेल्या २६ टीएमसी क्षमतेच्या मुळा प्रकल्पात सध्या ९६.९७, भंडारदरा धरणात ९५.१८; तर निळवंडे धरणात ८७.१३ टक्के पाणीसाठा आहे. मुळा धरणात ६५९२ क्युसेकने आवक सुरू आहे. चार दिवसांपूर्वी धरणातून पाच हजार क्युसेकने विसर्ग सुरू होता. आवक कमी झाल्याने हा विसर्ग चार हजारांवर आणला आहे. भंडारदरा धरणातून प्रवरा नदीत २२३८, निळवंडे धरणातून २३१४; तर ओझर बंधाऱ्यातून ११ हजार २८५ क्युसेकने प्रवरा नदीत विसर्ग सुरू होता.

दोन दिवसांपूर्वी हा विसर्ग पंचवीस हजारांच्या जवळपास होता. पाऊस कमी झाल्याने धरणात आवक कमी झाली, तसा विसर्गही कमी केला आहे. गोदावरी नदीत नांदुर मधमेश्वर बंधाऱ्यातून होणारा विसर्ग कमी केल्याने कोपरगाव, नेवासा, राहाता, श्रीरामपूर तालुक्यातील नदीकाठच्या गावांना दिलासा मिळाला. जिल्ह्याच्या अन्य भागांत तर पाऊस नाहीच, त्यामुळे शेतकरी मात्र तहबल आहेत. सोमवारी सकाळी सहापर्यंत झालेला पाऊस मिमी ः घाटघर ः ५८, रतनवाडी ः ७५, पांजरे ः ४८, वाकी ः ५२, भंडारदरा ः ५५, निळवंडे ः १८, अकोले १४.