पुणे जिल्ह्यात ४३ टॅंकरने पाणीपुरवठा 

पुणे  : जिल्ह्याच्या पश्चिम भागात दमदार पाऊस कोसळत असल्याने धरणे ओसंडून वाहून लागली आहेत. नद्यांना आलेल्या पाण्यामुळे पूरस्थिती निर्माण झाली आहे. दुसरीकडे कोरडवाहू भागातील बारामती, इंदापूर, दौंड, पुरंदरसह आंबेगाव तालुक्यामधील काही ठिकाणी पाणीटंचाई कायम असल्याचे चित्र आहे. या पाच तालुक्यांतील ३८ गावे आणि २६७ वाड्यांमध्ये पाण्याची टंचाई भासत असल्याने ४३ टॅंकरने पाणी पुरवठा करण्यात येत आहे.  

उन्हाळ्यात जिल्ह्यातील मावळ वगळता सर्व तालुक्यांमध्ये टॅंकरने पाणी पुरवठा केला जात होता. जिल्ह्यातील धरणांच्या पाणलोट क्षेत्रात झालेल्या मुसळधार पावसाने धरणे भरली. पावसाचा जोर कायम राहिल्याने धरणांतून मोठ्या प्रमाणावर विसर्ग करावा लागला. त्यामुळे नद्यांना अभूतपूर्व पूर आले. पुण्यातील धरणांमधून सोडलेल्या पाण्याने उजनीत १०० टक्के पाणीसाठा झाला. मात्र जिल्ह्यातील बारामती, इंदापूर, दौंड, पुरंदर तालुक्यांतील काही गावांमध्ये अद्यापही पिण्यायोग्य पाणी उपलब्ध झालेले नाही.