अकोला जिल्ह्यात जलसंधारणाच्या कामांना वेग

अकोला : दुष्काळमुक्त जिल्हा करण्यासाठी जिल्ह्यात सुजलाम सुफलाम अकोला अभियान राबविले जात अाहे. यासाठी प्रशासनाला भारतीय जैन संघटना सहकार्य करीत आहे. जिल्ह्यात मोठ्या प्रमाणात जलसंधारणाची कामे सुरू झाली आहेत. विविध दहा विभागांतर्गत सर्वच तालुक्यांत जलदगतीने कामे सुरू आहेत. मूर्तिजापूर व पातूर तालुक्यात जलसंपदा विभागाची काही कामे पूर्णसुद्धा झाली असल्याची माहिती आहे. 

भारतीय जैन संघटनेने विनामूल्य जेसीबी, पोकलँड मशिन उपलब्ध करून दिली आहेत. यासाठी डिझेलचा खर्च प्रशासन करीत आहे. विविध विभागामार्फत जिल्ह्यात चार हजार ९१ कामे केली जाणार आहेत. त्या माध्यमातून सुमारे १७५ लाख घनमीटर इतकी जलसंधारणाची कामे होणार आहेत. यामध्ये कपार्टमेंट बंडिंग, खोल सलग समतल चर, शेततळे, ई-क्लास शेततळे, मातीनाला/सिनाबा/गाळ काढणे, सिमेंट नाला खोलीकरण/सरळीकरण, ढाळीचे बांध, वन तलाव दुरुस्ती, मातीकाम, वनतळे, पाणी खडडे, पाझर तलाव, नद्या खोलीकरण, रुंदीकरण आदी कामे होतील. त्यासाठी २३ कोटी ५० लाख रुपयांच्या डिझेलचा खर्च होईल.

मूर्तिजापूर तालुक्यात ५७, पातूर तालुक्यात २७, बार्शिटाकळी आणि तेल्हारा तालुक्यात प्रत्येकी पाच, बाळापूर तालुक्यांत चार व अकोला तालुक्यात तीन मोठी कामे सुरू आहेत. यापैकी काही कामे पूर्ण झाली आहेत. कृषी विभाग, जलसंधारण, लघुपाटबंधारे, सामाजिक वनीकरण, वनविभाग, जलसंपदा विभाग, वन्यजीव, महानगरपालिका, लघुपाटबंधारे विभागाचे त्यासाठी मदत मिळत आहे. शेतकऱ्यांना विनामूल्य गाळही दिला जाणार आहे. जलसंधारणाच्या कामांसाठी जिल्हाधिकाऱ्यांच्या अध्यक्षतेखाली समिती स्थापन करण्यात आली अाहे. नोडल अधिकारी म्हणून उपजिल्हाधिकरी (रोहयो) अशोक अमानकर, तर समितीचे सदस्य सचिव म्हणून जिल्हा जलसंधारण अधिकारी श्यामकांत बोके हे काम करीत अाहेत.