पाणीप्रश्नावरील आंदोलनाचे नेतृत्व करणार ः अण्णा हजारे

नगर : ‘कुकडी’सह घोड धरणातील पाणीसाठे वाढविणे गरजेचे आहे. या प्रकल्पातील नेमक्‍या अडचणी काय आहेत, यावर मंथन व्हावे. डिंभे ते माणिकडोह धरणांदरम्यानच्या बोगद्यासाठी पाठपुरावा करीत आहोत. या पाणीप्रश्नी युवकांनी आक्रमक आंदोलन करावे, आपण त्याचे नेतृत्व करू, अशी ग्वाही ज्येष्ठ समाजसेवक अण्णा हजारे यांनी दिली. 

घोड-कुकडी पाटपाणी कृति समितीतर्फे आयोजित पाणी परिषदेत ते बोलत होते. राज्य आदर्श गाव संकल्प व प्रकल्प कृतिसमितीचे कार्याध्यक्ष पोपटराव पवार, आमदार राहुल जगताप यांच्यासह कार्यकर्ते व अधिकारी उपस्थित होते. 

हजारे म्हणाले, ‘‘कुकडी-घोड प्रकल्पांच्या नेमक्‍या अडचणी काय आहेत, त्यांचे निवारण कसे करायचे, यावर मंथन झाले पाहिजे. त्यासाठी अशा पाणी परिषदांची गरज आहे. भविष्यात ‘कुकडी'-घोड’च्या पाण्याचे समसमान वाटप होण्यासाठी युवकांनी आक्रमक भूमिका घेण्याची गरज आहे. मला युवकांच्या लढ्याचे नेतृत्व करण्यास आवडेल.’’ 

पोपटराव पवार म्हणाले, ‘‘जगातील शंभरावर देशांसमोर जलसंकट उभे आहे. लोकसंख्येच्या प्रमाणात मतदारसंघ तयार झाल्याने, शहरी भागातून जास्त लोकप्रतिनिधी पुढे आले आणि ग्रामीण भागाकडे दुर्लक्ष होऊ लागले, ही वस्तुस्थिती आहे. शेतीसाठीचे धरणाचे पाणी शहरांत जाऊ लागले. त्यामुळे धरणांतील पाण्याचे ‘ऑडिट’ करण्याची गरज आहे. मतपेटी आणि राजकारणात पर्यावरण व पाण्याचा प्रश्न जटिल बनतोय. त्यामुळे राजकारण बाजूला ठेवून जनजागृती व्हावी.’’ 

अण्णा हजारे यांनी लक्ष घातल्यामुळे डिंभे- माणिकडोह दरम्यानच्या बोगद्याचा प्रश्न मार्गी लागला. आता पाण्याच्या नियोजनातील नेत्यांचा हस्तक्षेप कमी झाल्यास शेतकऱ्यांना फायद्याचे होईल, असे आमदार जगताप म्हणाले.