परभणी जिल्ह्यात १३ लघू तलावांतील पाणीसाठा जोत्याखाली

परभणी : यंदा पावसाळ्याचा दीड महिन्याचा कालावधी उलटून गेला. तरीही अद्याप पाणलोट क्षेत्रात जोरदार पाऊस न झाल्यामुळे जिल्ह्यातील २२ पैकी १३ लघू सिंचन तलावांतील पाणीसाठा अद्याप जोत्याखाली आहे. आठ लघू तलाव अजून कोरडेच आहेत. त्यामुळे अनेक तालुक्यांतील पाणीटंचाईचे संकट अधिक गडद झाले आहे. केवळ एका तलावांमध्ये उपयुक्त पाणीसाठा आहे. 

यंदा जिल्ह्यात पावसाचे आगमन उशिरा झाले. आजवर सर्वत्र असमान, अल्प प्रमाणात पाऊस झाला. जिल्ह्यातील २२ लघु सिंचन तलावांच्या पाणलोट क्षेत्रात आजवरच्या पावसाळ्यात जोरदार पाऊस झाला नाही. त्यामुळे पेडगाव (ता. परभणी), आंबेगाव (ता. मानवत), नखातवाडी (ता. सोनपेठ), देवगाव, जोगवाडा, बेलखेडा, वडाळी, चारठाणा (सर्व ता. जिंतूर) हे आठ तलाव कोरडे आहेत. 

झरी (ता. पाथरी), तांदुळवाडी (ता. पालम), राणीसावरगाव, टाकळवाडी, कोद्री, पिंपळदरी (सर्व ता. गंगाखेड), चिंचोली, आडगाव, केहाळ, भोसी, मांडवी, दहेगाव, पाडाळी (सर्व ता. जिंतूर) या लघू तलावांतील पाणीसाठा अजून जोत्याखाली आहे. कवडा येथील तलावामध्ये ०.०६५ टक्के उपयुक्त पाणीसाठा शिल्लक आहे. मोठा पाऊस न झाल्यास उपयुक्त पाणीसाठा संपणार आहे. 

गेल्या तीन-चार दिवसांपासून पावसाने दडी मारली आहे. ऊन, वारे यामुळे बाष्पीभवनाचा वेग वाढला आहे. त्यामुळे या तलावांतील पाणीसाठा कमी होत आहे. तलावांवर पाणीपुरवठ्यासाठी अवलंबून असलेल्या लोकवस्त्यांवरील पाणीटंचाईचे संकट अधिक गडद झाले आहे. पाणलोट क्षेत्रात मोठा पाऊस झाला, तरच या तलावांमध्ये उपयुक्त पाणीसाठा जमा होऊन पाणीटंचाईचे संकट दूर होईल.