म्हैसाळ योजनेचे पाणी तिसऱ्या टप्प्यात दाखल

सांगली : म्हैसाळ योजनेचे पंप धिम्या गतीने सुरू आहेत. बेडग येथील तिसऱ्या टप्प्यातील पंप हाउसमध्ये म्हैसाळ योजनेचे पाणी मुख्य कालव्यातून दाखल झाले. सध्या म्हैसाळ येथील टप्पा क्रमांक एकमध्ये दोन पंप सुरू आहेत. नरवाड येथील टप्पा क्रमांक दोनमध्ये दोन पंप सुरू आहे. तिसऱ्या टप्प्यात पाणी दाखल झाले असून, पंप हाउस समोरील कालव्यातील पाणीपातळीत वाढ झाल्यानंतरच टप्पा क्रमांक तीनमधून मोटारी सुरू करणार असल्याची माहिती पाटबंधारे विभागाने दिली.

सध्या टप्पा क्रमांक एकमधील दोन पंपाद्वारे व टप्पा क्रमांक दोनमधील दोन पंपाद्वारे, अशी एकूण चार पंपाद्वारे सध्या पाण्याचा विसर्ग पुढे सुरू आहे. म्हैसाळ व नरवाड येथील पंप हाउसमध्ये आणखी एका पंपाद्वारे पाण्याचा विसर्ग केला जाणार आहे. धिम्या गतीने पाण्याचा विसर्ग सुरू असून, आरग-लांडगेवाडी येथील टप्पा क्रमांक चारमध्ये रविवारी पहाटे पाणी पोहोचण्याची शक्‍यता आहे.

सध्या शेतकऱ्यांची पाणी मागणी कमी असल्याने पोट शाखा कालव्याद्वारे पाणी अद्याप कोणत्याही क्षेत्राला देण्यात आले नसल्याचे दिसत आहे. जत तालुक्‍यात पाणी पोहोचल्या नंतरच पोट शाखा कालवे सुरू केले जाणार आहे. शेतकऱ्यांच्या मागणीनुसार व योजनेची रक्कम अदा केल्यानंतरच पोट कालव्यात पाणी सोडण्यात येणार आहे, अशी अधिकृत माहिती सूत्रांनी दिली.

मिरजपूर्व भागातील आरग, लिंगनूर, खटाव, शिंदेवाडी, लक्ष्मीवाडी या गावात सध्या पाण्याची पातळी खालावली असून, पाणी टंचाई निर्माण झाली आहे. मुख्य कालव्यातून वाहणारे पाणी मागणीनुसार स्रोतांत सोडल्यानंतरच विहिरींना पाझर फुटणार आहे. त्यामुळे मुख्य कालव्यातून वाहून जाणारे पाणी जत तालुक्‍यात जाईपर्यंत शाखा कालवे सुरू होणार की नाही, असा प्रश्न निर्माण झाला आहे.