कलिंगड, खरबूज उत्पादक शेतकऱ्यांना फटका

सोलापूर ः खास उन्हाळी हंगाम डोळ्यासमोर ठेवून कलिंगड, खरबूज या फळाचे उत्पादन घेणाऱ्या शेतकऱ्यांना ‘कोरोना’ विषाणूमुळे देश लॉकडाऊन झाला आहे. त्याचा मोठा फटका बसला असून, कलिंगड, खरबुजाचा प्रतिकिलोचा १० ते १५ रुपयांचा दर सध्या ४ ते ५ रुपयांवर आला आहे. उठाव मिळत नसल्याने दर घसरले आहेतच. पण स्थानिक भागासह पुणे, मुंबईच्या विस्कळीत बाजारामुळेही नुकसान सहन करण्याची वेळ त्यांच्यावर आली आहे. 

जिल्ह्यातील मंगळवेढा, मोहोळ, पंढरपूरसह पाणी असणाऱ्या बहुतांश भागात जानेवारी ते फेब्रुवारीमध्ये कलिंगड आणि खरबूजाची सर्वाधिक लागवड होते. मोहोळ तालुक्यातील पापरी, खंडाळी हा परिसर तर त्यासाठी खास प्रसिद्ध आहे. पण यंदा ‘कोरोना’ विषाणूच्या संकटामुळे हे शेतकरी धास्तावले आहेत. अनेक शेतकऱ्यांचा माल काढणीस आला आहे. तर काहींचा आठवड्याभरात सुरु होणार आहे. या सर्वांना त्याच्या विक्रीची चिंता लागली आहे. 

वास्तविक, या हंगामात दरवर्षी बाहेरील व्यापारी थेट शेतकऱ्यांच्या शेतावर येऊन कलिंगड, खरबुजाची खरेदी करतात. पण सध्या कोणीच इकडे फिरकत नसल्याने अडचण होऊन बसली आहे. एकरी किमान ५० ते ९० हजारापर्यंतचा खर्च या पिकाला येतो. पण सध्या तोही निघेल की नाही, याची शंका शेतकऱ्यांना सतावते आहे. 

सरकार पुणे, मुंबईच्या बाजारपेठेकडे जाणाऱ्या वाहतुकीच्या परवान्याबाबत सकारात्मक असले, तरी वाहनचालक आणि व्यापाऱ्यांच्या प्रतिसादाअभावी शेतकरी अडचणीत आले आहेत. शिवाय ही दोन्हीही फळे नाशवंत आहेत. ती फारकाळ टिकू शकत नाहीत. त्यामुळे वेळीच त्यावर मार्ग निघण्याची अपेक्षा शेतकऱ्यांना आहे. 

कोट मी दीड एकर क्षेत्रावर यंदा कलिंगड केले. पण सध्याच्या परिस्थितीमुळे अडचण झाली आहे. कलिंगडासाठी ९० हजारांचा खर्च झाला आहे, तो तरी निघेल, का याची शंका आहे. काय करावं सूचत नाही. - गोरख आसबे, शेतकरी, मारापूर, ता. मंगळवेढा, जि. सोलापूर