निम्न दुधना धरणातून नदीपात्रात सोडले पाणी

निम्न दुधना धरणातून नदीपात्रात सोडले पाणी
निम्न दुधना धरणातून नदीपात्रात सोडले पाणी

सेलू, जि. परभणी ः ब्रह्मवाकडी (ता. सेलू) येथील निम्न दुधना प्रकल्पाच्या धरणातून शनिवारी (ता. १) सायंकाळी पाचच्या सुमारास नदीपात्रात पाणी सोडण्यात आले. एकूण १५.४८ दलघमी पाणी सोडण्यात येणार आहे. त्यामुळे परभणी जिल्ह्यातील नदीकाठच्या गावांतील ग्रामस्थांना दिलासा मिळाला आहे. धरणातून पाणी सोडण्यास विरोध होत असल्यामुळे पोलिस बंदोबस्त ठेवण्यात आला.

परभणी जिल्ह्यातील नदीकाठच्या गावातील ग्रामस्थांनी केलेल्या मागणीनुसार जिल्हा प्रशासनाने पाणी सोडण्याचे आदेश दिल्यानंतर शनिवारी (ता. १) सायंकाळी पाचच्या सुमारास निम्न दुधना धरणाच्या एक आणि दोन क्रमांकाच्या दरवाजांतून नदीपात्रात पाण्याचा विसर्ग सुरू करण्यात आला. जालना जिल्ह्यातील लोकप्रतिनिधी तसेच जनतेचा या धरणातून पाणी सोडण्यास विरोध आहे.

परंतु परभणी जिल्ह्यातील सेलू, मानवत, जिंतूर, परभणी या तालुक्यांतील गावांतील नागरिकांना, जनावरांना पिण्याच्या पाण्यासाठी नदीपात्रात पाणी सोडण्यात आले. दरम्यान, नदीपात्रात झालेल्या प्रचंड वाळू उत्खननामुळे मोठमोठे खड्डे पडल्याने रहाटी (ता. परभणी) येथील बंधाऱ्यापर्यंत पाणी पोचण्यास नेमका किती वेळ लागेल हे निश्चित सांगता येत नाही.धरणातून एकूण १५.४८ दलघमी एवढे पाणी सोडल्यानंतर धरणाच्या जलाशयामध्ये एकूण ५६.२२० दलमघी एवढा पाणी मृतसाठा शिल्लक राहील. जलाशयातील पाण्यावर परतूर, मंठा, सेलू या शहरांसह आठ गावे पाणीपुरवठा व बुडीत क्षेत्रातील बहुतांश गावे पिण्याच्या पाण्यासाठी अवलंबून आहेत. 

नदीपात्रात पाणी सोडल्यामुळे सेलू, मानवत, परभणी तालुक्यांतील नदीकाठच्या पिंपरी, खुपसा, मोरेगाव, खेर्डा, राजा, राजावाडी, रोहिणा,सोन्ना, गोगलगाव, सावंगी, इरळद, मंगरूळ, टाकळी, नरळद, कोथळा, पार्डी, शेवडी, राजुरा, टाकळी कुंभकर्ण, नांदापूर, खानापूर, मांडवा, जलालपूर, झरी, कुंभारी, वाडीदमई, हिंगला, सुलतानपूर, पिंपळा, सनपुरी आदी गावांना फायदा होणार आहे.पुनर्वसन समितीतर्फे शनिवारी (ता. १) प्रकल्पस्थळी अर्धा तास निदर्शने करत पाणी सोडण्यास विरोध करण्यात आला. मोरेगावजवळील बंधाऱ्यात पाणी अडविण्यासाठी ग्रामस्थ आक्रमक होते. मात्र, जालना आणि परभणी पोलिसांच्या कडक बंदोबस्तात नदीपात्रात पाणी सोडण्यात आले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com