साताऱ्यातील धरणांमध्ये ९८ टक्‍क्‍यांवर पाणीसाठा 

सातारा : जिल्ह्यातील प्रमुख धरणांच्या पाणलोट क्षेत्रात मुसळधार पाऊस झाल्याने सर्व धरणे तुडूंब भरली आहेत. पाण्याची आवक मोठ्या प्रमाणात होत असल्याने अजून पाण्याचा विसर्ग सुरू ठेवण्यात आला आहे. कोयना धरणातही ९९.४९ टक्के एकूण पाणीसाठा सुरू असून या धरणाच्या दरवाज्यातून विसर्ग बंद करण्यात आला असून पायथा वीज गृहातून २१०० क्युसेक विसर्ग सुरू आहे. 

जिल्ह्यात कोयना, धोम, कण्हेर, उरमोडी, तारळी, धोम- बलकवडी ही प्रमुख धरणे आहेत. कोयना धरण हे वीजनिमिर्तीच्या दृष्टीने महत्त्वाचे धरण आहे. पाणलोट क्षेत्रात दमदार पाऊस झाल्याने हे धरण पूर्ण क्षमतेने भरले होते. या धरणातून क्षमतेपेक्षा अधिक म्हणजे १०७ टीएमपी पाणी नदीपात्रात सोडावे लागले आहे. इतर धरणांचीही हीच परिस्थिती झाली होती. या सर्व धरणांतून १५ टीएमसीपेक्षा अधिक पाणी सोडले असल्याचा अंदाज व्यक्त केला जात आहे. 

वीजनिर्मितीच्या दृष्टीने महत्त्वाचे असलेल्या कोयना धरणात १०४.७२ टीएमसी म्हणजेच ९९.४९ टक्के एकूण पाणीसाठा झाला आहे. माण, खटाव या दुष्काळी तालुक्‍यांच्या दृष्टीने उरमोडी धरण महत्त्वाचे आहे. या धरणात अतिरिक्त झालेला पाणीसाठा दुष्काळी तालुक्यात सोडण्यात आल्याने माणगंगा नदी वाहती झाली आहे. पिके जगविण्यास या पाण्याचा फायदा झाला आहे. सध्या या धरणात ९.९२ टीएमसी म्हणेजच ९९.५५ टक्के एकूण पाणीसाठा आहे. या धरणातून ४५० क्युसेक पाण्याचा विसर्ग सुरू आहे. धरणातील पाणी उपलब्धतेतमुळे एप्रिल, मे महिन्यांत पाणीटंचाई कमी भासण्यास मदत होणार आहे. कालव्याची कामे पूर्ण झाली असती तर अजून टंचाई कमी होण्यास मदत झाली असती. धोम धरणामुळे कृष्णा नदीची पाणीपातळी अजूनही जास्त असून सध्या या धरणात १३.३८ टीएमसी म्हणजे ९९.१२ टक्के पाणीसाठा झाला आहे. सध्या या धरणातून ४६० क्युसेक पाण्याचा विसर्ग सुरू आहे. 

कण्हेर धरणात ९.९८ टीएमसी म्हणजेच ९८.८१ टक्के पाण्याने भरले आहे. या धरणातून ५२४ क्युसेक पाण्याचा विसर्ग सुरू आहे. धोम-बलकवडी धरणात ४.०७ टीएमसी म्हणजेच ९९.६९ टक्के पाणीसाठा उपलब्ध आहे. या धरणातून २९७ क्युसेक पाण्याचा विसर्ग सुरू आहे. तारळी धरणात ५.७६ टीएमसी म्हणजेच ९८.४५ टक्के भरले आहे. या धरणातून पाण्याचा विसर्ग पूर्णपणे बंद करण्यात आला आहे.