पुणे विभागातील २४ तालुक्यांत पाणी टंचाई हटेना

पुणे : पुणे विभागातील कोल्हापूर, सांगली, सातारा, पुणे जिल्ह्याच्या धरण क्षेत्रात झालेल्या पावसाने धरणे ओसंडून वाहिली. या जिल्ह्यांच्या अनेक धरणातून जवळपास महिनाभर सातत्याने पाण्याचा विसर्ग सुरू आहे. तर दुसरीकडे संपूर्ण सोलापूरसह, पुणे, सातारा, सांगली जिल्ह्याच्या पूर्व भागात मात्र पावसाने दडी मारल्याचे चित्र आहे. यामुळे या भागात टंचाई कायम असल्याने २४ तालुक्यांतील ५०० गावे ३१३६ वाड्यांमध्ये तीव्र टंचाई कायम आहे. टंचाईग्रस्त भागात तहान भागविण्यासाठी ५८५ टॅंकरने धावत असल्याची माहिती विभागीय आयुक्त कार्यालयातर्फे देण्यात आली.  

उजनी धरण भरल्याने भिमेला पूर आला असतानाच, दुसरीकडे सोलापूर जिल्ह्यातील सर्वच तालुक्यांमध्ये टंचाई वाढली आहे. सातारा जिल्ह्यातील कोयना धरण आसंडून वाहत आहे. तर माण तालुक्यातही तीव्र टंचाई भासत असून, खटाव, फलटणमध्ये काही भागात टॅंकरने पाणी द्यावे लागत आहे. 

पुणे जिल्ह्यातील पुरंदर, बारामती, इंदापूर, दौंड, आंबेगाव तालुक्यात, तर पूरस्थितीचा सामना करणाऱ्या सांगली जिल्ह्याच्या जत, कवठेमहांकाळ, तासगाव, खानापूर, आटपाडी तालुक्यातही पाणी टंचाई कायम आहे. सोलापूर जिल्ह्यातील ३०१ गावे १ हजार ५९६ वाड्यांमध्ये सर्वाधिक ३४५ टॅंकर सुरू आहेत. सांगली जिल्ह्यातील ७७ गावे ५९२ वाड्यांना ८८ टॅंकरने पाणी पुरविले जात आहे. साताऱ्यातील ८२ गावे ६२४ वाड्यांना १०२ टॅंकरने, तर पुणे जिल्ह्यातील ४० गावे ३२४ वाड्यांमध्ये पिण्याच्या पाण्याचा पुरवठा करण्यासाठी ५० टॅंकर धावत आहेत. 

विभागातील एक लाख १२ हजारांहून अधिक लोकसंख्या, सातारा, सांगली, सोलापूरमधील ४ लाख ५९ हजार पशुधनासाठी टॅंकरने पाणी द्यावे लागत आहे. यात सोलापूर जिल्ह्यातील ६ लाख ९८ हजार, सांगलीतील १ लाख ७८ हजार, साताऱ्यातील जिल्ह्यातील सुमारे १ लाख ४५ हजार, पुणे जिल्ह्यातील १ लाख १ हजार लोकसंख्येचे समावेश आहेत. सातारा जिल्ह्यातील ७३ हजार, तर सांगलीतील सुमारे २६ हजार, तर सोलापूरातील ३ लाख ६० हजारांहून अधिक जनावरांना टॅंकरने पाणी पुरविण्यात येत आहेत.