मराठवाड्यातील १२८ गावांना पाणीटंचाईची झळ

औरंगाबाद  : मराठवाड्यात पाणीटंचाईची धग हळहळू वाढत चालली आहे. औरंगाबाद, जालना व परभणी या तीन जिल्ह्यांतील १२८ गाव-वाड्यांना टंचाईची झळ बसत असून, या गाव-वाड्यांची तहान भागविण्यासाठी १६० टॅंकरद्वारे पाणीपुरवठा करण्यात येत आहे. तसेच पाणीपुरवठ्यासाठी २६१ विहिरींचे अधिग्रहण करण्यात आले आहे.

मराठवाड्यात यंदा टंचाईचे सर्वाधिक चटके औरंगाबाद जिल्ह्याला बसत आहेत. पाणीटंचाई असणाऱ्या १२८ गाव-वाड्यांमध्ये एकट्या औरंगाबाद जिल्ह्यातील १०४ गावांचा समावेश आहे. या गावांची तहान भागविण्यासाठी १३६ टॅंकरद्वारे पाणीपुरवठा सुरू करण्यात आला आहे.

त्यापाठोपाठ जालना जिल्ह्यातील १३ गावांना १६ टॅंकरद्वारे पाणीपुरवठा सुरू आहे. नांदेड जिल्ह्यातील सात गावे व दोन वाड्यांना पाणीटंचाईची झळ सोसावी लागत आहे. या गावांना ७ टॅंकरद्वारे पाणीपुरवठा करावा लागत आहे.

परभणी जिल्ह्यातील एक गाव व एका वाडीला पाणीटंचाईचा सामना करावा लागत आहे. येथे एका टॅंकरद्वारे पाणीपुरवठा करण्यात येत आहे. गत आठवड्यात ९८ गावे आणि ३ वाड्या मिळून १०१ टंचाईग्रस्त गाव-वाड्यांना पाणीपुरवठा करण्यासाठी ११३ टॅंकरची सोय करण्यात आली होती.

औरंगाबाद, जालना, परभणी व नांदेड जिल्ह्यांतील २६१ विहिरींचे अधिग्रहणही करण्यात आले आहे. अधिग्रहित विहिरींपैकी १७६ विहिरींचे अधिग्रहण टॅंकरव्यतिरिक्‍त पाणीपुरवठ्यासाठी, तर ८५ विहिरी टॅंकरने करावयाच्या पाणीपुरवठ्यासाठी अधिग्रहित करण्यात आल्याची माहिती सूत्रांनी दिली. जालना जिल्ह्यातील भोकरदन व जाफ्राबाद, तसेच नांदेड जिल्ह्यातील नांदेड, परभणी जिल्ह्यांतील पालम तालुक्‍यात पाणीटंचाईच्या झळा बसणे सुरू झाले आहे. औरंगाबाद जिल्ह्यातील सर्वाधिक ४७ गावांना यंदा पाणीटंचाईची झळ सोसावी लागत आहे. त्यापाठोपाठ फुलंब्री तालुक्‍यातील २७ आणि सिल्लोड तालुक्‍यातील ११ गावांना पाणीटंचाईचा सामना करावा लागत आहे. वैजापूर, खुल्ताबाद, कन्नड आणि औरंगाबाद या तालुक्‍यांतील काही गावांनाही फेब्रुवारीतच पाणीटंचाईचा सामना करण्याची वेळ आली आहे.