पावसाअभावी राज्यातील पाणीटंचाई हटेना

पुणे : जुलै महिना संपत आला तरी जोरदार पावसाअभावी राज्यातील पाणीटंचाई हटण्याची चिन्हे दिसत नाहीत. टंचाईग्रस्त भागात पिण्याच्या पाण्याचा पुरवठा करण्यासाठी टॅंकरची धावाधाव सुरूच आहे. राज्यातील ३ हजार ६५७ गावे, ९ हजार १४९ वाड्यांमधील नागरिकांना पाणीपुरवठा करण्यासाठी ४ हजार ७१६ टॅंकर धावत असल्याचे राज्याच्या पाणीपुरवठा विभागातर्फे सांगण्यात आले. राज्याच्या तब्बल २३ जिल्ह्यांमध्ये पाणीटंचाईचे संकट कायम आहे.  मराठवाडा, पश्चिम विदर्भातील सर्वच जिल्ह्यांमध्ये टंचाईचा विळखा कायम आहे. कोकणातील सर्व जिल्ह्यांसह उत्तर महाराष्ट्रातील नंदूरबार जिल्ह्यातील टंचाई दूर झाली आहे. पश्चिम महाराष्ट्राच्या काही जिल्ह्यांत टंचाई कमी होऊ लागली आहे. उत्तर महाराष्ट्रातील नगर जिल्ह्यात सर्वाधिक पाणीटंचाई असून, तेथे ४७१ गावे, २७३७ वाड्यांसाठी ६९४ टॅंकर सुरू आहेत, तर मराठवाड्यातील औरंगाबाद जिल्ह्यातील ५३५ गावे, ९१ वाड्यांमध्ये ६६७ टॅंकरने, बीड जिल्ह्यातील ४५० गावे, १०३ वाड्यांमध्ये ३६८ टॅंकरने पाणीपुरवठा सुरू आहे. पश्चिम महाराष्ट्रातील सोलापूर जिल्ह्यातील ३३६ गावे, १९६७ वाड्यांमध्ये ३८२ टॅंकरने पाणीपुरवठा केला जात आहे. गतवर्षी २३ जुलै रोजी राज्यातील १० जिल्ह्यांमधील टंचाईग्रस्त असलेल्या ४८६ गावे २६६ वाड्यांमध्ये ४५९ टॅंकरने पाणी द्यावे लागले होते. यंदा मराठवाड्यातील औरंगाबाद, जालना, बीड, परभणी, हिंगोली, नांदेड, उस्मानाबाद, लातूर, उत्तर महाराष्ट्रातील नगर, नाशिक, धुळे, जळगाव, पश्चिम महाराष्ट्रातील सातारा, पुणे, सांगली आणि सोलापूर, पश्चिम विदर्भातील अमरावती, अकोला, वाशिम, बुलडाणा, यवतमाळ आणि पूर्व विदर्भातील नागपूर जिल्ह्यात टॅंकरने पाणीपुरवठा सुरू आहे.  राज्यातील पाणीटंचाईची विभागनिहाय स्थिती