नगर जिल्ह्यातील ४९० पाणी योजना बंद

नगर  ः पावसाळ्याचे पुरते तीन महिने उलटले तरी अजूनही अनेक भागांत पाऊस नाही. त्याचा परिणाम आता दिसत आहे. गेल्या वर्षी बंद पडलेल्या पाणी योजनांच्या स्रोताला अजूनही पाऊस नसल्याने पाणी आलेले नाही. जिल्ह्यातील सध्या सुमारे ५३१ वैयक्तिक पाणी योजना बंद आहेत. त्यातील तब्बल ४९० पाणी योजना स्रोतांमध्ये पाणी नसल्याने बंद आहेत. ज्या भागाने सातत्याने दुष्काळाच्या झळा सोसल्या आहेत त्या तालुक्यांतच सर्वाधिक पाणी योजना बंद असून पालकमंत्री राम शिंदे यांच्या जामखेड तालुक्यात बंद पाणी योजनांची संख्या सर्वाधिक आहे. विशेष म्हणजे जामखेडमध्येच जलयुक्त शिवार अभियानातून मोठा खर्च केला गेला आहे. 

जिल्ह्यातील अकोल्याच्या पश्चिम भागात झालेल्या जोरदार पावसामुळे उत्तर भागात असलेले मुळा, भंडारदरा, निळवंडे धरण भरले. या भागातून मोठ्या प्रमाणात पाणी जायकवाडीला सोडण्यात आल्याने ते धरणही भरले आहे. दक्षिण भागात भीमा नदीचा पट्टा वगळता अन्य तालुक्यांत मात्र अजूनही पाणीटंचाई कायम आहे. ग्रामीण भागात गावपातळीवर पाणीपुरवठा करण्यासाठी नळयोजना आहेत. गेल्या वर्षी दुष्काळ होता, पाणी नसल्याने पाणी योजनांचे स्रोत बंद पडले होते.

पावसाळ्यात पाऊस झाल्यावर जलस्रोत चालू होतील असे वाटत होते. परंतु, अजूनही चांगला पाऊस नसल्याने स्त्रोत कोरडेच आहेत. जिल्ह्यात १४४६ वैयक्तिक पाणी पुरवठा योजना आहेत. त्यातील ५३१ योजना बंद आहेत. नऊ योजना पाइपलाइन नादुरुस्त असल्याने पाच योजनांचे पाणी दूषित असल्याने व २७ योजना कायमस्वरूपी बंद आहेत. बाकीच्या ४९० योजना केवळ स्रोताला पाणी नसल्याने बंद असल्याचे जिल्हा परिषदेच्या पाणी पुरवठा विभागातून सांगण्यात आले. ज्या भागातील योजना बंद आहेत, तेथे सध्या ऐन पावसाळ्यातही पाणीटंचाई आहे. 

तालुकानिहाय बंद असलेल्या योजना ः अकोले ः ४, संगमनेर ः १०, कोपरगाव ः ०, राहाता ः ३, राहुरी ः ५, श्रीरामपुर ः २, नेवासा ः ३३, शेवगाव ः ७, पाथर्डी ः ६१, नगर ः ४७, पारनरे ः ८३, श्रीगोंदा ः ७५, कर्जत ः ९६, जामखेड ः १०२.