कोल्हापूर जिल्ह्यात पाणीसाठा नव्वद टक्क्‍यांवर

कोल्हापूर : जिल्ह्यातील प्रमुख धरणे नव्वद टक्के भरली अाहेत. पाऊस नसला तरी धरणांत पाणीसाठा समाधानकारक झाल्याने उन्हाळ्यात पाणीटंचाई कमी जाणवण्याची शक्‍यता आहे. जिल्ह्याला वरदायिनी ठरणारे राधानगरी धरण शनिवारी (ता. २६) शंभर टक्के भरले. तुळशी, वारणा, दूधगंगा या धरणांतही नव्वद टक्‍क्यांपेक्षा जास्त पाणीसाठा झाला आहे. यामुळे नजीकच्या काळात पिण्यासह शेतीच्या पाण्याची टंचाई भासणार नसल्याचे पाटबंधारे विभागाच्या सूत्रांनी सांगितले. ल्या दोन दिवसांपासून जिल्ह्यात ढगाळ हवामान व काही ठिकाणी रिमझिम पाऊस सुरू आहे. धरण क्षेत्रात थोडा अधिक पाऊस आहे. पंधरवड्यापूर्वी बहुतांशी धरणांत ८० टक्के पाणीसाठा झाला होता. त्या वेळी अनेक धरणांतील विद्युतनिर्मितीही सुरू झाली होती. परंतु पावसाने दडी दिल्याने काही धरणांतील पाणी सुरक्षित राहावे या हेतूने विद्युतनिर्मिती बंद ठेवून धरणातील पाणीसाठा वाढविण्याबाबत हालचाली सुरू झाल्या. गेल्या दोन-तीन दिवसांत मात्र धरण क्षेत्रात पाऊस झाल्याने धरणाचा पाणीसाठाही चांगलाच वाढला. अनेक धरणांचा पाणीसाठा नव्व्द टक्क्यांच्या वर गेल्याने धरणातील पाण्याच्या साह्याने होणारी विद्युतनिर्मिती पुन्हा गतीने सुरू होण्याची शक्‍यता आहे. सध्या बहुतांशी प्रमुख धरणांतील पाण्याचा विसर्ग नदीपात्रात सुरू करण्यात आला आहे. यामुळे नद्यांचे पाणीही वाढत असल्याचे पाटबंधारे विभागाच्या सूत्रांनी सांगितले. संततधार पाऊस नसल्याने पूर येण्याची शक्‍यता मात्र कमी असल्याचे आपत्ती नियंत्रण कक्षाच्या अधिकाऱ्यांनी सांगितले.  कोल्हापूर जिल्ह्यातील धरणसाठा (टीएमसीमध्ये)  राधानगरी - ८.२६ (८.३६), तुळशी ३.४७ (३.४७१ ), वारणा ३४.११ (३४.३९९), दूधगंगा २२.९२ (२५.३९३), कासारी २.७१ (२.७७४ ), कडवी २.५१ (पूर्ण भरले), कुंभी २.६९ (२.७१५), पाटगाव ३.५८ (३.७१६), चिकोत्रा ०.५८ (१.५२२), चित्री १.८३ (१.८८६), जंगमहट्टी १.२२ (पूर्ण भरले), घटप्रभा १.५६ (पूर्ण भरले), जांबरे ०.७९ (०.८२०) आणि कोदे ०.२१ (पूर्ण भरले).