`येलदरी`त ११.२९ टक्के उपयुक्त पाणीसाठा

परभणी : परभणी-हिंगोली जिल्ह्यांच्या सीमेवरून वाहणाऱ्या पूर्णा नदीवरील येलदरी धरणात रविवारी (ता.१३) सकाळी आठ वाजेपर्यंत ११.२९ टक्के उपयुक्त पाणीसाठा जमा झाला होता; परंतु सिद्धेश्वर आणि निम्नदुधना प्रकल्पांमध्ये अद्यापही उणे पाणीसाठा आहे.

बुलडाणा जिल्ह्यातील खडकपूर्णा धरणातून पाण्याचा विसर्ग करण्यात आल्यामुळे येलदरी धरणातील उपयुक्त पाणीसाठ्यात वाढ झाली. रविवारी (ता.१३) सकाळी या धरणामध्ये ११.२९ टक्के उपयुक्त पाणीसाठा उपलब्ध झाला होता. गतवर्षी (२०१८) याच तारखेला येलदरीमध्ये ९.३४ टक्के उपयुक्त पाणीसाठा झाला होता. पाण्याची आवक सुरू असल्यामुळे उपयुक्त पाणीसाठ्यामध्ये आणखी वाढ होणार आहे. येलदरी धरणाच्या खालच्या भागातील सिद्धेश्वर धरणाच्या पाणलोट क्षेत्रात कमी पाऊस झाल्यामुळे या धरणामध्ये अजूनही उणे १७.२५ टक्के पाणीसाठा आहे. गतवर्षी या धरणात २२.२४ टक्के उपयुक्त पाणीसाठा जमा झाला होता.

निम्नदुधना धरणातील एकूण पाणीसाठ्यात वाढ झाली असली तरी अद्याप उणे १७ टक्के पाणीसाठा आहे. गतवर्षी निम्नदुधना धरणामध्ये २१.५० टक्के उपयुक्त पाणीसाठा उपलब्ध झाला होता. जिंतूर तालुक्यातील निवळी येथील करपरा मध्यम प्रकल्पात ५ टक्के; तर गंगाखेड तालुक्यातील मासोळी मध्यम प्रकल्पात ८८ टक्के उपयुक्त पाणीसाठा झाला आहे. गोदावरी नदीवरील ढालेगाव, मुद्दगल येथील बंधा-यांमध्ये शंभर टक्के पाणीसाठा आहे. परंतु मुळी येथील बंधाऱ्यांचे दरवाजे नादुरुस्त झाल्यामुळे या बंधाऱ्यांमध्ये केवळ ९.४४ टक्के पाणीसाठा आहे. डिग्रस बंधाऱ्यामध्ये ७९ टक्के उपयुक्त पाणीसाठा आहे.

रविवारी (ता.१३) सकाळी पैठण येथील जायकवाडी धरणात शंभर टक्के उपयुक्त पाणीसाठा होता. जायकवाडीतून उजव्या कालव्याद्वारे ९०० क्युसेकने विसर्ग सुरू असल्यामुळे माजलगाव धरणात १.८६ टक्के उपयुक्त पाणीसाठा झाला. डाव्या कालव्याद्वारे ७०० क्युसेकने विसर्ग सुरू आहे. भूजल पातळीत वाढ व्हावी यासाठी परभणी जिल्ह्यातील डाव्या कालव्याच्या वितरण प्रणालीद्वारे पाणी सोडण्यात आले आहे.