खानदेशातील दुष्काळी भागातील प्रकल्पांत साठले पाणी

जळगाव  ः खानदेशातील दुष्काळी भागातील निम्मे व त्यापेक्षा अधिक रिकामे मध्यम प्रकल्प तीन दिवसांपूर्वीच्या पावसात बऱ्यापैकी भरले आहेत. 

जळगाव जिल्ह्यातील एरंडोल तालुक्यातील अंजनी प्रकल्प १०० टक्के भरला आहे. नदीत प्रवाही पाणी असून, दोन दिवसांपूर्वी अंजनी नदीला चांगला पूर आला होता. पारोळा तालुक्यातील भोकरबारी प्रकल्पदेखील सुमारे ८० टक्के भरला आहे. जामदा बंधाऱ्यातून या प्रकल्पात पाणी सोडण्यात आले होते. त्यासाठी एरंडोल व अमळनेर भागातील लोकप्रतिनिधींनी शासनाकडे पाठपुरावा केला होता. साक्री (जि.धुळे) तालुक्यातील बुराई प्रकल्पदेखील ८३ टक्के भरला आहे. हा प्रकल्प गेल्या वर्षी सुमारे सात वर्षांनंतर पूर्ण भरला होता. 

जूनमध्ये बुराई प्रकल्पात जेमतेम जलसाठा शिल्लक होता. साक्री, धुळे भागात बऱ्यापैकी पाऊस झाला. परंतु, हा प्रकल्प रिकामाच होता. नंदुरबार व साक्री तालुक्याच्या सिमेनजीक हा प्रकल्प आहे. त्याच्या लाभक्षेत्रात पाऊस जेमतेम होत असतो. परंतु, त्यातही समाधानकारक जलसाठा आहे. अंजनी, भोकरबारी, बुराई या प्रकल्पांची साठवण क्षमता प्रत्येकी दोन, २.११, तीन टीएमसी एवढी आहे. 

तापी, गिरणा नदीत प्रवाही पाणी

तापी व गिरणा नदीत प्रवाही पाणी आहे. गिरणा नदीला बुधवारी (ता.२३) बऱ्यापैकी पूर आला होता. पूर ओसरला आहे. तापी नदीमधील पूरही ओसरला आहे. जामनेरातील वाघूर, शिरपूर (जि.धुळे) येथील अनेर, साक्री भागातून येणाऱ्या पांझरा, शहादा (जि.नंदुरबार) मधील सुसरी, गोमाई, तळोदा भागातील खरडी, रावेर (जि.जळगावमधील) सुकी, यावल (जि.जळगाव) मधील मोर, चोपडा (जि.जळगाव) मधील सातपुडा पर्वतातून येणारी गूळ या नद्यांना प्रवाही पाणी आहे. 

हे प्रकल्प १०० टक्के भरले

जळगाव जिल्ह्यातील गिरणा, बहुळा, अग्नावती, हिवरा, तोंडापूर, सुकी, अभोरा, मंगरूळ, गारबर्डी, मोर, गूळ, तोंडापूर, अंजनी हे प्रकल्प १०० टक्के भरले आहेत. धुळ्यातील अनेर, पांझरा, कनोली, मालनगाव, सोनवद, नंदुरबारमधील दरा, रंगावली, सुसरी या प्रकल्पात १००टक्के जलसाठा आहे. तापी नदीवरील भुसावळ (जि.जळगाव) नजीकच्या हतनूर धरणातही ७६ टक्के जलसाठा आहे. त्यात पाण्याची आवक कायम आहे. यामुळे त्याचे चार दरवाजे पूर्ण उघडले आहेत. त्याच्या सांडव्यातून पाणी सोडले जात आहे.