उजनीतून २ जूनला भीमेत पाणी सोडण्याचे नियोजन

सोलापूर  : उजनी धरणातील पाणीपातळी दिवसेंदिवस खालावत असून सध्या धरणातील पाणीसाठा आता मायनस २.९६ टक्‍क्‍यांवर गेला आहे. सध्या कॅनॉलद्वारे पाणी सोडण्यात आले असून सीना नदीवरील कोळेगाव बंधाऱ्यापर्यंत पाणी पोचले आहे. परंतु, ते बंद करून २ जूनपासून भीमा नदीत पिण्यासाठी पाणी सोडण्याचे नियोजन लाभक्षेत्र विकास प्राधिकरणतर्फे करण्यात आले आहे. कालवा समितीच्या बैठकीतील नियोजनाप्रमाणे आता दोन आर्वतने सोडण्यात आली आहेत. परंतु, उजनीतील पाणी मायनस २६ टक्‍क्‍यांपर्यंत वापरण्यास परवानगी द्यावी, असा प्रस्ताव कृष्णा खोरे विकास महामंडळाचे कार्यकारी संचालक यांनी शासनाकडे पाठविला आहे. आता पिण्यासाठी पाणी उपलब्ध व्हावे, या उद्देशाने चिंचपूर बंधाऱ्यांपर्यंत पाणी सोडण्यात येणार आहे. भीमा नदीत शेतीसाठी पाणी सोडण्याची तरतूद नाही. मात्र, जिल्हाधिकाऱ्यांमार्फत पिण्याकरिता आकस्मित आरक्षणाद्वारे ग्रामीण व शहरी पाणीपुरवठ्यासाठी भीमा नदीतून पाणी सोडण्यात येते, असे लाभक्षेत्र विकास प्राधिकरणाद्वारे सांगण्यात आले. भीमा नदीवरील २३ बंधाऱ्यांपैकी औज बंधारा (१.६६ दशलक्ष घनफूट) तर चिंचपूर बंधाऱ्यात २.१६ दशलक्ष घनफूट पाणी शिल्लक आहे. उर्वरित भाट निमगाव, टाकळी, शेवरे, वाफेगाव, मिरे, जांभूड, पिराची कुरोली, गुरसाळे, पंढरपूर, मुंढेवाडी, पुळूज, बठाण, माचणूर, वडापूर, अरळी, भंडारकवठे, लवंगी या बंधाऱ्यांमध्ये उपयुक्‍त पाणीसाठाच शिल्लक नाही.