पुणे : महावितरणने वीजबिल वसुलीसाठी वीजजोड तोडण्याची मोहीम हाती घेतली. यामुळे शिरूर तालुक्यातील शेतकऱ्यांनी लवकर पेरणी केलेली पिके करपण्याच्या मार्गावर आहेत. अनेक ठिकाणी खरीप पेरण्या, कांदा लागवडी खोळंबल्या आहेत. पिकांना कसे पाणी द्यायचे? पिके कशी जगवायची? पैसेच नसल्याने बिले कशी भरायची, असा प्रश्‍न शेतकऱ्यांना पडला आहे.
शिरूरच्या पूर्व भागात घोड तसेच भीमा नदीमुळे हजारो हेक्टर क्षेत्र ओलिताखाली आले आहे. या परिसरात फळबागांबरोबर मोठ्या प्रमाणात तरकारीदेखील घेतली जाते. सध्या कांदा लागवड सुरू आहे. काही ठिकाणी लागवडीनंतर पिकांना पाणी देण्याची गरज आहे. त्याचबरोबर मोठ्या प्रमाणात कांद्याची रोपे शेतकऱ्यांच्या शेतात आहेत. कांद्याच्या रोपांना दोन दिवसांना पाणी द्यावे लागते. अशा स्थितीत शेती पंपांची वीज तोडल्याने पिकांना पाणी कसे द्यायचे, असा प्रश्‍न आहे. कांदा रोपे करपण्याची शक्यता आहे.
मागील दोन ते तीन महिन्यांपूर्वी महावितरणने शेतकऱ्यांकडून काही प्रमाणात वीजबिल वसुली केली आहे. या भागातील अनेक शेतकऱ्यांकडे वीजबिलाची थकबाकी आहे. त्यातच कोरोना, शेतीमालाचे ढासळलेले भाव, यामुळे शेतकऱ्यांची आर्थिक स्थिती खालावली आहे. राज्यातील सत्ता बदलानंतर वीजबिलात सवलत मिळेल या आशेने शेतकऱ्यांनी वीजबिले भरली नाहीत. आदीमुळे थकबाकीत वाढ झाली.
रोहित्रांचा वीजपुरवठा खंडित
सध्या या भागात अनेक शेतकऱ्यांनी पिके घेण्यासाठी कर्जे घेतली आहेत. बाजारभाव चांगला मिळत असल्याने पुन्हा कांदा लागवडी सुरू केल्या आहेत. यातून दोन पैसे मिळतील, अनेकांची देणी भागवू, अशी आशा शेतकऱ्यांना आहे. तीन महिन्यांपूर्वी वीजबिलाचा पहिला हप्ता भरला आहे, तसेच दोन व तीन हप्ते भरणे बाकी आहे. अशा शेतकऱ्यांचे विद्युत पंप बंद केले जात आहेत. रोहित्रावर थकबाकीदार जास्त असतील, तर पूर्ण रोहित्राचा विद्युतपुरवठा खंडित केला जात आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.