गुरुवारपर्यत काही ठिकाणी हलक्‍या पावसाचा अंदाज

पुणे ः राज्यात हवेचा दाब वाढत आहे. त्यामुळे पावसाचा जोर ओसरत आहे. येत्या गुरुवार (ता. 28) पर्यत कोकण, गोवा व मध्य महाराष्ट्रात बऱ्याच ठिकाणी, मराठवाड्यात काही ठिकाणी, तर विदर्भात तुरळक ठिकाणी हलका पाऊस पाऊस पडेल. रविवारी (ता. 24) सोलापूर, कोल्हापूरमध्ये हलका पाऊस झाला.

गेल्या दोन ते तीन पावसापासून पावसाने राज्यातील अनेक भागांत उघडीप दिली आहे. सध्या कोकण, मध्य महाराष्ट्रातील काही ठिकाणी ढगाळ हवामान असून अनेक ठिकाणी ऊन पडत आहे. आज (ता. 25) कोकण, गोव्यात काही ठिकाणी तर मध्य महाराष्ट्र, मराठवाडा व विदर्भात तुरळक ठिकाणी पाऊस पडण्याची शक्‍यता आहे. उद्या (ता.26) कोकण, गोवा व मध्यम महाराष्ट्रात काही ठिकाणी, तर मराठवाडा व विदर्भात काही ठिकाणी हलका पावसाचा अंदाज आहे.

कोकणातील ठाणे, रायगड, रत्नागिरी, सिंधुदूर्ग, पालघर जिल्ह्यातील अनेक ठिकाणी रविवारी (ता. 24) ढगाळ हवामान होते. काही ठिकाणी ऊन पडल्याचे चित्र होते. तर घाटमाथ्यावर पावसाच्या अधूनमधून सरी बरसत होत्या. मध्य महाराष्ट्रातील कोल्हापूर, सोलापूर येथे जोरदार पाऊस पडला. उर्वरित भागात ढगाळ हवामान होते. पुणे, नगर, नाशिक, सातारा, सांगली, जिल्ह्यातही ऊन, सावल्याचा खेळ सुरू होता. खान्देशातील धुळे, जळगाव, नंदुरबार जिल्ह्यात सकाळपासून ऊन पडल्याचे चित्र होते.

मराठावाड्यातील औरंगाबाद, जालना, बीड, लातूर, उस्मानाबाद, नांदेड, परभणी, हिंगोली जिल्ह्यात हवामान कोरडे असून अनेक भागात ऊन पडल्याचे चित्र होते. काही ठिकाणी ढगाळ हवामान होते. विदर्भातही नागपूर, चंद्रपूर, गडचिरोली, अमरावती, बुलडाणा, अकोला, गोंदिया, वाशिम, यवतमाळ, वर्धा, भंडारा जिल्हयातील बहुतांशी ठिकाणी हवामान कोरडे होते. तर अनेक ठिकाणी ऊन पडल्याचे चित्र होते. त्यामुळे हवामानात उकाडा वाढला असून विदर्भ व मराठवाड्यातील कमाल तापमानातही किंचित वाढ झाली आहे.

रविवारी (ता.24) सकाळपर्यत झालेला पाऊस (मिलिमीटरमध्ये) मध्य महाराष्ट्र ः बार्शी 50, जामखेड 40, मंगळवेढा, फलटण, सांगोला, विटा 30, जत, खटाव, वडूज, शिरोळ 20, कागल, कवठेमहाकाळ 10.