पूर्व विदर्भात पावसाचा अंदाज

पुणे   : बंगालच्या उपसागरात आज (ता. २९) कमी दाबाचे क्षेत्र तयार होण्याची शक्यता आहे. यामुळे राज्यात पावसाला पोषक हवामान होत आहे. पूर्व विदर्भातील भंडारा, चंद्रपूर, गडचिरोली, गोंदिया, नागपूर, वर्धा या जिल्ह्यांत हलक्या ते मध्यम पावसाची शक्यता हवामान विभागाने वर्तविली आहे. बुधवारी (ता. २८) सकाळपासून राज्यात ढगाळ हवामान होते, त्यामुळे उकाड्यातही वाढ झाली.

बुधवारी सकाळपर्यंतच्या २४ तासांमध्ये विदर्भ, मध्य महाराष्ट्र, कोकणात तुरळक ठिकाणी हलका पाऊस पडला. विदर्भातील तापमान कमी झाले असून, उर्वरित राज्यात अनेक ठिकाणी तापमान ३० अंशांच्या पुढेच असून, सोलापूर येथे सर्वाधिक ३४.३ अंश सेल्सिअस तापमानाची नोंद झाली. मॉन्सूनचा आस असलेला कमी दाबाचा पट्टा राजस्थानच्या जैसलमेरपासून बंगालच्या उपसागरापर्यंत सक्रिय आहे. यातच उपसागरात तयार होत असलेल्या कमी दाबाच्या क्षेत्रामुळे कोकणात काही ठिकाणी, मध्य महाराष्ट्र, मराठवाड्यात तुरळक ठिकाणी आणि विदर्भात अनेक ठिकाणी पाऊस पडण्यास पोषक हवामान होत आहे. 

बुधवारी (ता. २८) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस, मिलिमीटरमध्ये (स्रोत - हवामान विभाग) : कोकण : दोडामार्ग ३०, कुडाळ, कणकवली, पेण, मंडणगड, जव्हार, मुरूड, गुहागर, माथेरान, चिपळूण, ठाणे प्रत्येकी २०.  मध्य महाराष्ट्र : जामनेर ४०, इगतपुरी २०, आक्रणी, पारोळा, बोधवड, चाळीसगाव प्रत्येकी २०, मुक्ताईनगर, गगणबावडा, रावेर, गिरणा धरण, धरणगाव, शहादा, एरंडोल, अक्कलकुवा, जळगाव, सिंदखेडा प्रत्येकी १०.  विदर्भ : वर्धा, देवळी, नांदगावकाझी, बाळापूर, एटापल्ली, पातूर प्रत्येकी १०. घाटमाथा : आंबोणे ३०, शिरगाव, ताम्हिणी २०.