कोकण, मध्य महाराष्ट्र, मराठवाड्यात मुसळधारेचा इशारा 

पुणे  : अरबी समुद्र आणि बंगालच्या उपसागरात असलेल्या कमी दाबाचे क्षेत्र पोषक ठरल्याने राज्यात वादळी पाऊस पडत आहे. आज (ता. २३) कोकण, मध्य महाराष्ट्र, मराठवाड्यात मेघगर्जना, विजांसह मुसळधार पावसाचा इशारा दिला आहे. विदर्भातही तुरळक ठिकाणी वादळी पावसाची शक्यता हवामान विभागाने वर्तविली आहे. सोमवारी (ता. २१) दिवसभर असलेल्या उघडिपीने कमाल तापमानात पुन्हा वाढ झाली आहे. 

अरबी समुद्रावरून येणारे बाष्पयुक्त वारे आणि बंगालच्या उपसागरावरून येणारे वारे यांचा संगम दक्षिण मध्य महाराष्ट्र आणि मराठवाड्यात होत असल्याने या भागात पावसाने जोर धरला आहे. अरबी समुद्रातील कमी दाबाचे क्षेत्र तीव्र होत असतानाच, बंगालच्या उपसागरात मंगळवारी (ता. २२) नवीन कमी दाबचे क्षेत्र तयार झाले आहे. या दोन्ही प्रणाली पूरक ठरून दक्षिण भारतात पाऊस वाढणार आहे. कोकणात आज (ता. २३) अति जोरदार, मध्य महाराष्ट्र, मराठवाड्यात जोरदार पावसाचा अंदाज आहे. कोकण किनाऱ्यालगत ताशी ४५ ते ५५ किलोमीटर वेगाने वारे वाहणार असल्याने मासेमारीसाठी खोल समुद्रात न जाण्याचा इशारा देण्यात आला आहे. 

सोमवारी (ता. २१) दिवसभर पावसाने उघडीप दिली होती. ढगाळ हवामानासह ऊनही पडत होते. त्यामुळे गेली दोन तीन दिवस कमी झालेले कमाल तापमान पुन्हा वाढल्याचे दिसून आले. कोकणात तापमान ३० अंशांच्या पुढे गेले. मंगळवारी (ता. २२) सकाळपर्यंतच्या २४ तासांमध्ये अलिबाग येथे सर्वाधिक ३५.४ अंश सेल्सिअस तापामनाची नोंद झाली. रत्नागिरी येथे तापमान ३४.३ अंशांवर पोचले. पावसाळी वातावरणामुळे तापमानात चढउतार होण्याची शक्यता आहे. 

मंगळवारी (ता. २२) सकाळी साडेआठ वाजेपर्यंतच्या २४ तासांत राज्यातील विविध ठिकाणचे कमाल तापमान, कंसात सरासरीच्या तुलनेत वाढ, घट (अंश सेल्सिअसमध्ये) : पुणे २८.५ (-३.२), जळगाव २७.२(-७.६), कोल्हापूर २७.८(-३.६), महाबळेश्वर २२.८(-३.१), मालेगाव २५.२ (-८.२), नाशिक २७.० (-५.३), सातारा २६.५ (-४.२), सोलापूर २९.४ (-३.३), अलिबाग ३५.४ (३.०), डहाणू ३३.० (०.३), सांताक्रूझ ३३.१ (-०.५), रत्नागिरी ३४.३(१.९), औरंगाबाद २८.० (-३.९), परभणी २७.६ (-४.९), नांदेड ३३.० (०.२), अकोला २९.० (-४.५), अमरावती २७.२ (-६.४), बुलडाणा २३.८ (-६.६), चंद्रपूर २९.२(-३.५), गोंदिया २९.५(-२.८), नागपूर २९.४ (-३.३), वर्धा २८.९ (-३.७), यवतमाळ २७.०(-४.७).