सोमवारनंतर हवामान कोरडे राहण्याचा अंदाज

पुणे : रविवार (ता. २०)पर्यंत दक्षिण कोकण, गोव्यात तुरळक ठिकाणी मेघगर्जनेसह पावसाची शक्यता आहे. सोमवार (ता. २१) नंतर गोव्यासह संपूर्ण राज्यात हवामान कोरडे राहील, असा अंदाज हवामान विभागाने वर्तविला आहे.    दक्षिण कोकण, गोवा, मध्य महाराष्ट्र, मराठवाडा व विदर्भात तुरळक ठिकाणी आज (ता.१८) मेघगर्जनेसह पाऊस पडेल. उर्वरित भागात हवामान कोरडे राहील. गुरुवारी (ता. १७) चंद्रपूर येथे ४५.२ अंश सेल्सिअस तापमानाची नोंद झाली. विदर्भ व मराठवाड्यात काही ठिकाणी उष्णतेची लाट असल्याने उन्हाचा चटका कायम आहे, त्यामुळे कमाल तापमानाचा पारा एक अंश सेल्सिअसने घसरला आहे. तसेच, मध्य महाराष्ट्रातही ढगाळ हवामानामुळे कमाल तापमानाचा पारा कमी होऊन ४० ते ४३ अंश सेल्सिअसच्या दरम्यान आहे. उन्हाची तीव्रता कमी झाली असली, तरी सकाळपासून उकाड्यात वाढ होत आहे. बुधवारी (ता. १७) दुपारनंतर मध्य महाराष्ट्राचा दक्षिण भाग, कोकण, गोवा व विदर्भात तुरळक ठिकाणी अचानक ढग भरून आले. ढगांनी एकत्रित दाटी करत विजांचा कडकडाट आणि सोसाट्याच्या वाऱ्यासह तुरळक ठिकाणी मेघगर्जनेसह जोरदार पाऊस पडला, त्यामुळे उन्हाळी पिकांचे नुकसान झाले. तर आंबा, डाळिंब, भाजीपाला पिकांचेही काही प्रमाणात नुकसान झाले.   गुरुवारी (ता. १७) सकाळी आठ वाजेपर्यंतच्या चोवीस तासांतील कमाल तापमान  (अंश सेल्सिअस)  : मुंबई ३४.२,  सांताक्रूझ ३४.१, रत्नागिरी ३५.०, पुणे ३९.८, नगर ४२.७, जळगाव ४३.२, कोल्हापूर ३७.९, महाबळेश्वर ३२.७, मालेगाव ४२.८, नाशिक ३८.८, सांगली ३४.६, सातारा ३९.५, सोलापूर ४०.६, औरंगाबाद ४१.४, परभणी शहर ४४.१, नांदेड ४२.५, अकोला ४४.१, अमरावती ४३.८, बुलडाणा ४१.०, ब्रह्मपुरी ४५.१, चंद्रपूर ४५.२, गोंदिया ४२.०, नागपूर ४२.२, वाशीम ४२.८, वर्धा ४४.९, यवतमाळ ४३.५. अदेनच्या खाडीत ‘सागर’ चक्रीवादळ अरबी समुद्रात आलेल्या चक्रीवादळाची तीव्रता वाढून अदेनच्या खाडीत गुरुवारी (ता. १७) सकाळी ८.३० वाजता ‘सागर’ चक्रीवादळाची निर्मिती झाली. हे चक्रवादळ येमेनपासून ४०० किलोमीटर ईशान्येकडे तर सोकोट्रापासून ५६० किलोमीटर वायव्येकडे होते. अदेनच्या खाडीत ताशी ६५ ते ७५ किलोमीटर वेगाने वारे वाहणार असून, उंच लाटा उसळण्याची शक्यता आहे. शुक्रवारी (ता. १८) पहाटे या चक्रीवादळाची तीव्रता कमी होणार असल्याचे हवामान विभागाने स्पष्ट केले आहे.