राज्यात तुरळक ठिकाणी पावसाची शक्यता

पुणे : राज्यात आजपासून कोकण, गोव्यात काही ठिकाणी, मध्य महाराष्ट्र, मराठवाडा व विदर्भात तुरळक ठिकाणी मेघगर्जनेसह पाऊस पडण्याची शक्यता हवामान विभागाच्या सूत्रांनी वर्तविली आहे.   कोकण, मध्य महाराष्ट्र व मराठवाड्यातील काही भागांत ढगाळ हवामानामुळे गेल्या काही दिवसांपासून वाढलेला तापमानाचा पारा चांगलाच खाली घसरला आहे. विदर्भात तुरळक ठिकाणी उष्णतेची लाट आहे. त्यामुळे उन्हाचा चटका चांगलाच जाणवत आहे. सकाळी दहा वाजल्यापासून उन्हाची तीव्रता वाढत आहे. दुपारी हा पारा ४५ अंश सेल्सिअसच्या वर जात आहे. त्यामुळे विदर्भात अजून दोन ते चार दिवस उन्हाची तीव्रता राहणार असून, पुढील आठवड्यात हा पारा कमी होण्याची शक्यता आहे. गुरुवारी (ता. ३१) सकाळपर्यंतच्या चोवीस तासापर्यंत विदर्भातील चंद्रपूर येथे उच्चांकी ४७.९ अंश सेल्सिअसची नोंद झाली आहे. कोकण, मध्य महाराष्ट्र व मरावाड्यातील बहुतांशी ठिकाणांचा पारा चाळिशीच्या खाली उतरला आहे.  राज्याच्या उंबरठ्यावर येऊन ठेपलेल्या माॅन्सूनच्या आगमनामुळे राज्यातील वातावरणात बदल होत आहे. कधी ऊन, तर कधी ढगाळ हवामान होत आहे. येत्या चार जूनपर्यंत राज्यात बहुतांशी ठिकाणी ढगाळ हवामान होऊन तुरळक ठिकाणी मेघगर्जनेसह पाऊस पडेल. काही ठिकाणी सोसाट्याचा वारा सुटून विजांच्या कडकडाटासह पावसाची शक्यता आहे. पुणे परिसरातही आकाश अंशतः ढगाळ राहणार आहे.  गुरुवारी (ता. ३१) सकाळी आठ वाजेपर्यंतच्या चोवीस तासातील कमाल तापमान (अंश सेल्सिअस) : मुंबई ३५.०, सांताक्रूझ ३५.०, अलिबाग ३६.७, रत्नागिरी ३३.७, डहाणू ३६.६, पुणे ३५.८, नगर ४१.६, जळगाव ४२.२, कोल्हापूर ३४.६, महाबळेश्वर २९.१, मालेगाव ४२.२, नाशिक ३६.७, सांगली ३५.६, सातारा ३४.६, सोलापूर ३९.२, औरंगाबाद ३९.८, उस्मानाबाद ३८.५, परभणी शहर ४२.९, नांदेड ४१.५, अकोला ४३.०, अमरावती ४३.४, बुलढाणा ४०.०, ब्रह्मपुरी ४६.९, चंद्रपूर ४७.९, गोंदिया ४४.५, नागपूर ४६.३, वर्धा ४५.७, यवतमाळ ४४.५.