कोकणात अतिवृष्टी तर मध्य महाराष्ट्रात मुसळधारेचा इशारा

पुणे   : अरबी समुद्रातील कमी दाबाचे क्षेत्राचे उद्यापर्यंत (ता. २५) ‘चक्री वादळात’ रूपांतर होण्याचे संकेत आहेत. हे चक्रीवादळ किनारपट्टीकडे येऊन, पुन्हा खोल समुद्राकडे जाण्याची शक्यता आहे. बंगालच्या उपसागरात ठळक कमी दाबाचे क्षेत्र आहे. आज (ता. २४) कोकण आणि मध्य महाराष्ट्रात तुरळक ठिकाणी मुसळधारेचा तर उर्वरितर महाराष्ट्रात हलक्या ते मध्यम पावसाचा अंदाज हवामान विभागाने वर्तविला आहे.   

अरबी समुद्रात असलेल्या कमी दाब क्षेत्राची तीव्रता आज (ता. २४) आणखी वाढणार आहे. किनाऱ्याकडे सरकत असलेल्या या प्रणालीचे उद्या (ता. २५) चक्रीवादळात रूपांतर होणार आहे. चक्रीवादळ तयार होताच ते पश्‍चिमेकडे खोल समुद्रात जाण्याची शक्यता आहे.   

दरम्यान कोकण, गोवा, कर्नाटकमध्ये जोरदार वाऱ्यासह, अतिवृष्टीचा इशारा देण्यात आला आहे. कोकण किनारपट्टीवर ताशी ५० ते ६० किलोमीटर वेगाने वारे वाहून समुद्र खवळणार आहे. तर बंगालच्या उपसागरातील ठळक कमी दाब क्षेत्रामुळे आंध्र प्रदेश, तेलंगणा, ओडिशातही जोरदार वाऱ्यासह पाऊस पडण्याची शक्यता आहे. 

पावसाळी हवामानामुळे आकाशात ढग जमा होत आहेत. अधूनमधून पडणाऱ्या उन्हामुळे चटकाही जाणवत असल्याने तापमानात चढ-उतार सुरू आहेत. दोन दिवसांपूर्वी खालावलेले तापमान पुन्हा थोडेसे वाढल्याचे दिसून आले आहे. बुधवारी (ता. २३) सकाळपर्यंतच्या २४ तासांमध्ये मराठवाड्यातील नांदेड येथे सर्वाधिक ३३ अंश सेल्सिअस तापामनाची नोंद झाली. राज्यातील

विविध ठिकाणचे कमाल तापमान, कंसात सरासरीच्या तुलनेत वाढ, घट (अंश सेल्सिअसमध्ये) : पुणे २९.७ (-२.०), जळगाव २८.०(-६.८), कोल्हापूर २७.८(-३.६), महाबळेश्‍वर २२.७ (-३.२), मालेगाव २८.५ (-४.९), नाशिक २८.६ (-३.७), सांगली २८.८ (-४.५), सातारा २८.१ (-२.६), सोलापूर ३१ (-१.७),  रत्नागिरी ३१.५ (-०.९), औरंगाबाद २८.२ (-३.७), परभणी ३१.४ (-१.१), नांदेड ३३ (०.२), अकोला २७.५ (-६.०), अमरावती २९ (-४.६), बुलडाणा २४ (-६.४), चंद्रपूर ३२.६ (-०.१), गोंदिया ३०.४ (-१.९), नागपूर ३०.७ (-२.०), वर्धा ३१ (-१.६), यवतमाळ ३० (-१.७).