पुणे : मॉन्सून दाखल झाल्यानंतर कोकण किनारपट्टीवर पावसाने दमदार हजेरी लावली. राज्याच्या इतर भागात जोरदार पावसाची प्रतीक्षा असताना मॉन्सूनचा प्रवाह मंदावल्याने पावसाने उघडीप दिली आहे. आठवडाभर पावसात खंड पडण्याची शक्यता असून, शनिवारपर्यंत (ता.१६) तळकोकणात काही ठिकाणी मध्यम ते जोरदार, तर मध्य महाराष्ट्र, विदर्भात तुरळक ठिकाणी हलक्या पावसाची शक्यता आहे. गुरुवारपासून (ता.१४) मराठवाड्यात मुख्यत: कोरड्या हवामानाचा अंदाज हवामान विभागाने वर्तविला आहे. मंगळवारी सकाळपर्यंतच्या २४ तासांमध्ये कोकणात पावसाचा जोर मंदावला होता, तर विदर्भात काही ठिकाणी मुसळधार पावसाने हजेरी लावली. दोडामार्ग, वेंगुर्ला, राजापूरमध्ये मध्यम स्वरूपाच्या पावसाची नोंद झाली. मध्य महाराष्ट्र, मराठवाड्याच्या बहुतांशी भागात पावसाने उघडीप दिली होती. तर पूर्व विदर्भातील मुलचेरा, चामोर्शीसह काही ठिकाणी मुसळधार पावसाने हजेरी लावली. मुलचेरा येथे उच्चांकी १३० मिलिमीटर पावसाची नोंद झाल्याचे हवामान विभागातर्फे सांगण्यात आले. अरबी समुद्रावरील ढगांचे आच्छादन कमी झाले असून, राज्यात अंशत: ढगाळ हवामानामुळे ऊन सावल्यांचा खेळ सुरू आहे. कर्नाटकपासून केरळपर्यंत किनारपट्टीला समांतर हवेचा कमी दाबाचा पट्टा सक्रिय असल्याने तळकोकणात तुरळक ठिकाणी मध्यम ते जोरदार पाऊस शक्य आहे. आज (बुधवारी) किनाऱ्यालगत तशी ३५ ते ४५ किलोमीटर वेगाने वारे वाहून समुद्र खवळणार असल्याने मासेमारीसाठी समुद्रात न जाण्याचा इशारा देण्यात आला आहे, तर उर्वरित महाराष्ट्रात तुरळक ठिकाणी हलक्या पावसाचा अंदाज आहे.
मंगळवारी (ता. १२) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस (मिलीमीटरमध्ये - स्राेत हवामान विभाग) :
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.