नांदेड, परभणी, हिंगोली जिल्ह्यांत खरिपावर ओल्या दुष्काळाचे सावट

नांदेड : नांदेड, परभणी, हिंगोली जिल्ह्यांत गेल्या आठवडाभरापासून सतत पाऊस सुरू आहे. येत्या काही दिवसांपर्यंत पाऊस येण्याचा अंदाज वर्तवण्यात आला आहे. त्यामुळे खरीप हंगामावर ओल्या दुष्काळाचे सावट आहे. यंदाची दिवाळी पावसाळी वातावरणातच साजरी करण्याची वेळ शेतकऱ्यांवर आली आहे.

दरम्यान, नांदेड, परभणी, हिंगोली जिल्ह्यांतील १४९ पैकी १४७ मंडळांमध्ये मंगळवारी (ता. २५) सकाळी आठपर्यंतच्या २४ तासांमध्ये हलका ते जोरदार पाऊस झाला. नांदेड, परभणी जिल्ह्यांतील १५ मंडळांमध्ये अतिवृष्टी झाली. सेलू तालुक्यातील देऊळगाव मंडळात सर्वाधिक १९१ मिलिमीटर पाऊस झाला. नांदेड जिल्ह्यातील सर्व ८० मंडळांमध्ये हलका ते जोरदार पाऊस झाला. नांदेड तालुक्यातील वसरणी, भोकर तालुक्यांतील मोगाली, लोहा तालुक्यांतील माळाकोळी, मुखेड तालुक्यांतील जाहूर, बाऱ्हाळी या पाच मंडळामध्ये अतिवृष्टी झाली. मुखेड तालुक्यातील बाऱ्हाळी मंडळात सर्वाधिक १३४ मिलिमीटर पाऊस झाला.

परभणीत सर्व ३९ मंडळांमध्ये मध्यम ते जोरदार पाऊस झाला. सेलू तालुक्यातील देऊळगाव, चिकलठाणा, मानवत तालुक्यांतील कोल्हा, मानवत, केकरजवळा, पाथरी तालुक्यांतील हदगाव, पाथरी, बाभळगाव, सोनपेठ तालुक्यांतील सोनपेठ, पालम तालुक्यातील बनवस या दहा मंडाळामध्ये अतिवृष्टी झाली. देऊळगावात सर्वाधिक १९१ मिलिमीटर पाऊस झाला. बनवसमध्ये अतिवृष्टीमुळे पूल पाण्याखाली गेला. त्यामुळे सात ते आठ गावांचा संपर्क काहीकाळ तुटला. हिंगोली जिल्ह्यातील ३० पैकी २८ मंडळांत हलका ते जोरदार पाऊस झाला. हिंगोली, कळमनुरी, वसमत, औंढा नागनाथ, सेनगाव तालुक्यांतील अनेक मंडळांमध्ये जोरदार पाऊस झाला.

मंडळनिहाय पाऊस (३५ मि.मींच्या पुढे )ः