परभणीत ओला दुष्काळासाठी शेतकरी संघर्ष समितीचा रास्ता रोको

परभणी :‘‘जिल्ह्यात सरसकट ओला दुष्काळ जाहीर करुन शेतकऱ्यांना प्रतिहेक्टरी ५० हजार रुपये मदत जाहीर करावी, या मागणीसाठी शेतकरी संघर्ष समितीतर्फे  बुधवारी (ता.४) जिल्ह्यात विविध ठिकाणी रास्ता रोको आंदोलन करण्यात आले. मागण्या मान्य न केल्यास येत्या काळात  तीव्र आंदोलन छेडण्यात येईल, असा इशारा जिल्हा  प्रशासनास देण्यात आला.

परतीच्या पावसाने शेतकरी मोठ्या प्रमाणात अडचणीत सापडले आहेत. हातातोंडाशी आलेला घास पाच ते सहा दिवस झालेल्या वादळी वाऱ्यासह विक्रमी पावसाने हिरावून नेला. शासनाने मोजकीच मंडळे समाविष्ट न करता संबंध जिल्हा ओला दुष्काळग्रस्त जाहीर करावा. पीक विमा परतावा मंजूर करावा. योग्य नियोजन करुन पणन महासंघ तसेच सीसीआयतर्फे कापूस खरेदी सुरु करावी. या मागणीसाठी शेतकरी संघर्ष समितीतर्फे पोखर्णी फाटा, त्रिधारा फाटा, टाकळी कुंभकर्ण, पेडगाव फाटा या ठिकाणी रास्ता रोको आंदोलन करण्यात येईल, असा इशारा शेतकरी संघर्ष समितीतर्फे देण्यात आला.

यामुळे परभणी-जिंतूर, परभणी -गंगाखेड, परभणी- पाथरी, परभणी -वसमत या मार्गावरील वाहतूक काही काळ खोळंबली होती. गणेश घाटगे, किर्तीकुमार बुरांडे, माऊली कदम, अंतराव कदम, संतोष देशमुख, डॉ. धर्मराज चव्हाण, सचिन जवंजाळ, ज्ञानोबा जोगदंड, किरण चक्रपाणी, विजय खिस्ते,  प्रभाकर शिंदे, नृसिंह ढेबरे, लहुजी शेळके, माधव शेळके, सुरेश हरकळ आदीसह शेतकरी सहभागी झाले.