पाऊस लांबल्याने आता कोणते पीक घ्यावे? शेतकऱ्यांची चिंता

पाऊस लांबल्याने आता कोणते पीक घ्यावे?
पाऊस लांबल्याने आता कोणते पीक घ्यावे?

नगर : मॉन्सून लांबल्याने आता खरीप पिकांत बदल करावे लागणार आहे. मात्र, आता पाऊस आल्यावर कोणत्या पिकांची पेरणी, लागवड करावी याची चिंता शेतकऱ्यांना लागली आहे. अशा परिस्थितीत कृषी विभागाने गावोगावी जाऊन शेतकऱ्यांना मार्गदर्शन करणे गरजेचे असताना कृषी विभागाकडूनही जिल्ह्यातील शेतकरी बेदखल झाल्यासारखी स्थिती आहे. दुष्काळी स्थितीतून शेतकऱ्यांना बाहेर काढण्यासाठी मार्गदर्शन करण्याचे जिल्हाधिकारी व अन्य वरिष्ठांनी आदेश देऊनही त्याची दखल घेतलेली दिसत नाही. 

नगर जिल्ह्यात गेल्या वर्षभरात दुष्काळाने शेतकरी पुरता होरपळून निघाला आहे. दुष्काळी भागात पिण्याच्या पाण्यासाठी गेल्या आठ महिन्यांपासून संघर्ष सुरू आहे. जनावरांना चारा नाही, पिण्यासाठी पाणी नसल्याने छावण्यांमध्ये जनावरे जगवावी लागत आहेत. त्यामुळे आता शेतीबाबत थेट बांधावर जाऊन शेतकऱ्यांना मार्गदर्शन करा, दुष्काळी स्थितीतून शेतकऱ्यांना बाहेर काढण्यासाठी कृषी विभागाने पुढाकार घेण्याचे शासन स्तरावरूनच आदेश दिले गेले आहेत. जिल्हाधिकारी राहुल द्विवेदी यांनीही खरीप आढावा बैठकीत कृषी विभागाचे कान टोचले.

मात्र, तरीही कृषी विभागाच्या अधिकाऱ्यांना दखल घ्यावी वाटली नाही हेच सध्याच्या स्थितीतून स्पष्ट होत आहे. जिल्ह्यातील नगर, पारनेरच्या काही भागांत खरिपात मूग, उडीदाचे क्षेत्र अधिक असते. काही भागांत बाजरी, तुरीची पेरणी होते. कापसाचे क्षेत्रही बऱ्यापैकी वाढत आहे. साधारण दहा जूनपर्यंत चांगला पाऊस झाला तर उडीद, मुगाची मोठ्या प्रमाणात पेरणी होते. आता मॉन्सूनचा पाऊस लांबला आहे. दरवर्षीच्या तुलनेत यंदा पंधरा दिवस उलटूनही पाऊस नाही. त्यामुळे आता जेव्हा चांगला पेरणीयोग्य पाऊस होईल तेव्हाच पेरण्या, लागवडीला सुरवात होईल. मात्र, पाऊस लांबल्याने आता कोणते पीक घ्यावे ? असा प्रश्न शेतकऱ्यांना पडला आहे. 

तपासणीचे काय झाले? जिल्ह्यात गेल्यावर्षी पाऊस नव्हता. त्यामुळे बियाणे, कीटकनाशके व खते शिल्लक राहिली. जुन्याच मुदतबाह्य कीटकनाशकांवर नवीन शिक्के लावून विक्री केली जात असल्याचा प्रकार महिनाभरानंतर उघड झाला. त्यानंतर संभाजी बिग्रेडच्या मागणीनुसार जिल्ह्यात तपासणी केल्यावर कोट्यवधी रुपयांची कीटकनाशके मुदतबाह्य असल्याचे आढळून आले. हीच कीटनाशके शेतकऱ्यांच्या माथी मारली जात होती. मुळात कृषी विभागाच्या नियमित तपासणीत याबाबी स्पष्ट व्हायला पाहिजे होत्या. मात्र कृषी विभागाकडून होणारी तपासणी फक्त कागदावर होत असल्याचे दिसून आले. आता त्या वेळी झालेल्या तपासणीचे काय झाले? याची माहिती कृषी विभागाकडून मिळत नाही.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com