परभणी जिल्ह्यात गहू, हरभऱ्याचे क्षेत्र वाढण्याची शक्यता

परभणी :  सिंचन स्त्रोतांना मुबलक प्रमाणात पाणी उपलब्ध झाले. त्यामुळे यंदाच्या रब्बी हंगामात जिल्ह्यात २ लाख ८७ हजार ५० हेक्टरवर पेरणी होईल. गहू, हरभरा या पिकांच्या क्षेत्रात वाढ, तर ज्वारी, करडईच्या क्षेत्रात घट होईल, असा अंदाज कृषी विभागातर्फे काढण्यात आला.

जिल्ह्यात रब्बी हंगामातील पिकांचे सर्वसाधारण क्षेत्र २ लाख १५ हजार ९६१ हेक्टर आहे. यंदा जोरदार पावसामुळे जायकवाडी, येलदरी, सिध्देश्वर, माजलगाव, निम्न दुधना हे मोठे प्रकल्प, करपरा, मासोळी हे मध्यम प्रकल्प, गोदावरी नदीवरील पाच उच्च पातळी बंधाऱ्यासह अन्य नद्यावरील बंधारे, लघु तलाव, विहिरी आदी सिंचन स्त्रोतांमध्ये मोठ्या प्रमाणावर पाणीसाठा उपलब्ध झाला आहे.

त्यामुळे यंदा रब्बी पिकांखालील क्षेत्रात वाढ अपेक्षित आहे. एकूण २ लाख ८७ हजार ५० हेक्टरवर पेरणी प्रस्तावित आहे. गव्हाच्या क्षेत्रात दीडपटीने, तर हरभऱ्याच्या क्षेत्रात दुपटीहून अधिक वाढ होण्याची शक्यता आहे. ज्वारी, करडईच्या क्षेत्रात यंदाही गेल्या वर्षाप्रमाणे घट होईल. शेतकऱ्यांना पेरणीसाठी आवश्यक बियाणे, खते  पुरवठ्याचे नियोजन कृषी विभागातर्फे करण्यात आले.

महाबीजकडे २२ हजार ४८० क्विंटल, राष्ट्रीय बियाणे

महामंडळाकडे ३ हजार क्विंटल, खाजगी कंपन्यांकडे २० हजार ६०६ क्विंटल असे एकूण ४६ हजार ८६ क्विंटल बियाण्यांची मागणी करण्यात आली. त्यात ज्वारीचे २ हजार ४१५ क्विंटल, गव्हाचे १७ हजार क्विंटल, मक्याचे २२५ क्विंटल, हरभऱ्याचे २६ हजार २५० क्विंटल, करडईचे ११९ क्विंटल, सुर्यफुलाचे २ क्विंटल, इतर पिकांचे एकूण ७५ क्विंटल बियाण्यांचा समावेश आहे. रब्बी हंगामातील पेरणीसाठी एकूण १० हजार ९३८ टन खतसाठा उपलब्ध आहे. त्यात युरिया ३ हजार ८८ क्विंटल आहे.