मुख्यमंत्री अन्नप्रक्रिया योजना सुरूच ठेवणार ः कृषिमंत्री भुसे

पुणे : गटशेती तसेच फार्मर प्रोड्युसर कंपनीच्या माध्यमातून शेतमाल प्रक्रिया उद्योगाद्वारे शेतकऱ्यांच्या बळकटीकरणासाठी शासन आणखी चार ते पाच वर्षे मुख्यमंत्री अन्नप्रक्रिया योजना राबवणार असल्याची माहिती कृषिमंत्री दादासाहेब भुसे यांनी दिली.

पुणे जिल्ह्याअंतर्गत हवेली तालुक्यात महाराष्ट्र शासनाच्या कृषी विभागाच्या वतीने कोरोना संसर्गापासून संरक्षणासाठी कृषीमित्र व शेतकरी गटामार्फत बांधावर बियाणे व खते पुरवठा करण्याच्या उपक्रमास पेरणे (ता. हवेली) येथून गुरूवारी (ता.२८) सुरुवात करण्यात आली.

पुणे विभागीय कृषी सहसंचालक दिलीप झेंडे, जिल्हा अधीक्षक कृषी अधिकारी बाळासाहेब पडघलमल, हवेली तालुका कृषी अधिकारी सपना ठाकुर, पेरणेचे सरपंच रुपेश ठोंबरे, हवेलीचे माजी पंचायत समिती सभापती ज्ञानेश्वर वाळके, डोंगरगावचे सरपंच विक्रम गायकवाड तसेच वाघोली मंडल कृषी अधिकारी सत्यजित शितोळे, लोणीकंद येथील शेती विकास शेतकरी बचतगटाचे अध्यक्ष किसन कंद भैरवनाथ कृषी विकास शेतकरी बचतगटाचे अध्यक्ष गोरक्ष गोते आदी उपस्थित होते.

श्री. भुसे म्हणाले की, शेतकरी वर्गाला दिलासा देण्यासाठी शेतमालाची योग्य साठवणूक करणे आवश्यक आहे. त्यासाठी लागणारी शीतगृहे, तसेच त्यांवर प्रक्रिया उद्योग उभे करणे, ही संपूर्ण साखळी मुख्यमंत्री अन्नप्रक्रिया योजनेच्या अंतर्गत उभी केली जात आहे. गटशेती व फार्मर प्रोड्युसर कंपनीच्या माध्यमातून शेतमाल प्रक्रिया उद्योगाद्वारे शेतकऱ्यांचे बळकटीकरण करण्यांसाठी मुख्यमंत्री अन्नप्रक्रिया योजना आणखी चार ते पाच वर्षे राबविण्यात येणार आहे.

तालुका कृषी अधिकारी सपना ठाकूर म्हणाल्या की, कोरोनाच्या पार्श्वभूमीवर सुरक्षिततेसाठी शेतकऱ्यांना खत दुकानात न येता शेतकरी गटांमार्फत थेट शेताच्या बांधावरच खते व निविष्ठा यांचा पुरवठा करण्यासाठी कृषी विभागाने ही योजना सुरू केली आहे. या योजनेअंतर्गत शेतकरी गटांना युरिया, १०:२६:२६, १५:१५:१५ व २४:२४:० अशा प्रकारची खते वितरित करण्यात येत आहेत.