एफआरपी एकरकमी देणार की तुकडे होणार?

सातारा : यावर्षीच्या ऊस हंगामासाठी एक ते दोन कारखाने वगळता उर्वरित सर्व साखर कारखान्यांना गाळप परवाना साखर आयुक्तांकडून मिळाला आहे. काही कारखान्यांच्या टोळ्याही दाखल झाल्या आहेत. पण, एफआरपी जाहीर न करताच कारखान्यांनी गाळप हंगामाची तयारी सुरू केली आहे. तर गेल्या वर्षी कारखान्यांनी एफआरपीचे दोन तुकडे करून शेतकऱ्यांना बिले दिली होती. पण, यावर्षी साखरेचे दर व सॅनिटायझर निर्मितीतून मिळालेल्या नफा लक्षात घेता शेतकऱ्यांना एकरकमी एफआरपी मिळेल, अशी आशा आहे.  

जिल्ह्यात १६ साखर कारखाने असून, यापैकी गेल्या वर्षी सात सहकारी व सात खासगी साखर कारखान्यांनी गाळप केले. गेल्या वर्षी सर्व कारखाने थोडे उशिरा सुरू झाले. पण, प्रत्येकाने आपापल्या कार्यक्षेत्रात नोंदणी केलेल्या उसाचे गाळप केले. त्यासोबतच एक दोन कारखान्याचा अपवाद वगळता एफआरपीची रक्कमही १०० टक्के अदा केली आहे. पण, कोरोनामुळे व मजुरीच्या प्रश्‍नावरून ऊसतोड मजुरांची उपलब्धता कमी प्रमाणात झाल्यास कारखान्यांना ऐनवेळी हार्वेस्टरचा वापर करावा लागणार आहे. पण, सर्वच कारखान्यांना हार्वेस्टर मशिन वापरणे शक्‍य नाही.

त्यामुळे ऊस तोडणीसाठी टोळ्यांवर हंगामाचे भवितव्य अवलंबून राहणार आहे. तरीही परवाना मिळालेल्या कारखान्यांनी टोळ्या आणण्यास सुरुवात केली आहे. पण, महत्त्वाचा मुद्दा एफआरपीचा आहे. गेल्या वर्षीची एफआरपीची रक्कम एक दोन कारखाने वगळता सर्वांनी १०० टक्के पूर्ण केलेली आहे. त्यामुळे यावर्षी एफआरपीची रक्कम कारखाने शेतकऱ्यांना एकरकमी देणार का, याकडे सर्वांचे लक्ष लागलेले आहे. अद्याप तरी एकाही कारखान्याने एफआरपीबाबत भूमिका जाहीर केलेली नाही. साखरेचे दर व कारखान्यांनी सॅनिटायझर निर्मितीतून नफा कमविला आहे. त्यामुळे कारखान्यांना एकरकमी एफआरपी देणे सोपे जाणार आहे.

कारखान्यांच्या प्रतिसादावर दराचे भवितव्य शेतकरी संघटनांनी अद्याप यावर्षीच्या ऊसदराची मागणी केलेली नाही. लवकरच ऊस परिषदा होऊन ऊसदराची मागणी होईल. या मागणीकडे कारखाने किती गांभीर्याने पाहणार, यावर यावर्षीच्या दराचे भवितव्य अवलंबून आहे.