मोबदल्याशिवाय काम करू देणार नाही : आमदार भारत भालके

 मंगळवेढा, जि. सोलापूर  ः ‘‘मंगळवेढा तालुक्‍यात रत्नागिरी-नागपूर महामार्गाचे काम सुरू आहे. काही शेतकऱ्यांना भूसपांदनाचे पैसे न देताच ठेकेदारांकडून पोलिस बळाचा वापर केला जात आहे. हा शेतकऱ्यांवर अन्याय आहे. मोबदला दिल्याशिवाय काम करू नये. अन्यथा, आंदोलन करण्यात येईल’’, असा इशारा आमदार भारत भालके यांनी दिला. 

मंगळवेढा तालुक्‍यात महामार्गाचे काम वेगाने सुरू आहे. तालुक्‍यात माचणूर, ब्रह्मपुरी, मंगळवेढा, गणेशवाडी, आंधळगाव येथे ठेकेदाराकडून शेतकऱ्यांवर बळजबरी होत आहे. रस्त्यांचे काम पोलिस बळाचा वापर करून केले जात असल्याने शेतकऱ्यांनी आमदार भालके यांच्याशी संपर्क साधला. त्यानंतर जिल्हाधिकारी, पोलिस अधीक्षक, उपविभागीय पोलिस अधिकारी, उपविभागीय अधिकारी, तहसीलदार, पोलिस निरीक्षक यांच्याशी भालके यांनी दूरध्वनीद्वारे संपर्क साधला. 

भालके म्हणाले, ‘‘ज्यांना भूसंपादनाचे पैसे मिळाले नाहीत, ते शेतकरी शेकडो वर्षांपासून मालक आहे. उतारे त्यांच्या नावे निघत आहेत. ते जमीन कसत असताना काझी नामक शेतकऱ्याने मालकी हक्क सांगून शेतकऱ्यांना मोबदला देण्यास विरोध केला. याबाबत उच्च न्यायालयात हे प्रकरण गेले आहे. न्यायालयाचा निर्णय होईपर्यंत व शेतकऱ्यांना मोबदला दिल्याखेरीज काम करू नये.’’

शेतकऱ्यांवर पोलिस बळाचा वापर

‘‘एकीकडे जमीन जाऊनही मोबदला नाही आणि दुसरीकडे ठेकेदाराकडून पोलिस बळाचा वापर करून शेतकऱ्याच्या पिकाचे व घराचे नुकसान केले जात आहे. जिथे शेतकऱ्यांना पैसे मिळाले आहेत, तेथील रस्ता करण्यास कोणाचीही आडकाठी नाही. सध्या जिल्ह्यात १४४ चे कलम लागू आहे. कायदा सुव्यवस्था ठेवण्याचे काम प्रशासनाचे आहे. परंतु, पोलिस बळाचा वापर शेतकऱ्यांवर करत असतील, त्यांच्या न्यायासाठी १४४ चे उल्लंघन करून आंदोलन करण्यात येईल,’’ असा इशारा आमदार भालके यांनी दिला.