जालन्यातील ऊस संशोधन केंद्र उभारणीला सुरुवात  

पुणे ः ऊस शेतीच्या विकासासाठी विदर्भ, मराठवाड्याला मार्गदर्शक ठरणाऱ्या ऊस संशोधन केंद्राच्या उभारणीचे काम सुरू झाले आहे. या कामांचा वसंतदादा शुगर इन्स्टिट्यूटच्या (व्हीएसआय) बैठकीत माजी केंद्रीय कृषिमंत्री शरद पवार यांनी स्वतः आढावा घेतला.  

जालन्याच्या अंबड तालुक्यातील मौजे पाथरवाला गावाच्या शिवारात ‘व्हीएसआय’कडून संशोधन केंद्र उभारले जात आहे. राज्याच्या ऊस संशोधनाच्या वाटचालीत पाडेगाव व मांजरी बुद्रुक या दोन भागांचा वाटा मोठा आहे. मात्र विदर्भ आणि मराठवाड्याला डोळ्यासमोर ठेवून स्वतंत्र संशोधन केंद्र होण्यासाठी श्री. पवार यांचा पाठपुरावा सुरू होता. केंद्रासाठी सरकारी जागा मिळण्याचा ‘व्हीएसआय’चा प्रस्ताव मुख्यमंत्री उद्धव ठाकरे यांनी मंजूर केल्यानंतर २२ फेब्रुवारी १२८ एकर जागा ‘व्हीएसआय’कडे वर्ग करण्यात आली.  

जालन्याच्या या केंद्रावर आता १३ एकरवर ऊस लागवडदेखील करण्यात आली आहे. ‘व्हीएसआय’च्या त्रैमासिक बैठकीत मंगळवारी (ता. १५) याबाबत माहिती देण्यात आली. साखर कारखान्यांच्या ऑक्सिजननिर्मिती प्रकल्पांची स्थिती देखील श्री. पवार यांनी समजून घेतली. या वेळी चर्चेत उपमुख्यमंत्री अजित पवार, ना. जयंत पाटील, राजेश टोपे, बाळासाहेब पाटील, ‘व्हीएसआय’चे उपाध्यक्ष दिलीप वळसे पाटील, महासंचालक शिवाजीराव देशमुख, साखर महासंघाचे अध्यक्ष जयप्रकाश दांडेगावकर, विस्माचे अध्यक्ष बी. बी. ठोंबरे तसेच इतर मान्यवर उपस्थित होते.