दुष्काळ निवारणार्थ समन्वयाने काम करा : पालक सचिव कुंटे

नाशिक : जिल्ह्यात दुष्काळी परिस्थितीमुळे पाणीटंचाईची गंभीर समस्या निर्माण झाली आहे. यामुळे नागरिकांबरोबरच जनावरेही बेजार झाली आहेत. या परिस्थितीचा सामना करण्यासाठी सर्व यंत्रणांनी समन्वयाने काम करावे, असे निर्देश सामान्य प्रशासन विभागाचे अपर मुख्य सचिव, जिल्ह्याचे पालक सचिव सीताराम कुंटे यांनी दिले.

सिन्नर तालुक्यातील गुळवंच गावात सुरू करण्यात आलेल्या चारा छावण्यांना कुंटे यांनी गुरुवारी (ता.१६) भेट देऊन पशुपालकांशी संवाद साधला. जिल्हा परिषदेचे मुख्य कार्यकारी अधिकारी डॉ. नरेश गिते, जिल्हा पुरवठा अधिकारी श्रीनिवास अर्जुन, उपजिल्हाधिकारी (रोहयो) पल्लवी निर्मळ, उपविभागीय अधिकारी डॉ. अर्चना पठारे, जलसंधारण अधिकारी सागर शिंदे, जिल्हा अधीक्षक कृषी अधिकारी संजीव पडवळ, तहसीलदार राहुल कोताडे, गटविकास अधिकारी लता गायकवाड उपस्थित होत्या.

कुंटे म्हणाले, की शेतकऱ्यांच्या पशुधनाला चांगला सकस चारा मिळावा, यासाठी चारा छावण्या सुरू करण्यात आल्या आहेत. छावणीतील प्रत्येक लहान-मोठ्या जनावरांची छावणी चालकांनी नोंद ठेवावी. जनावरांना शासन निकषांनुसार चारा, खुराक देऊन आवश्यक पाणी उपलब्ध करून द्यावे. पाऊस पडण्यासाठी आणखी बराच कालावधी बाकी आहे. अशा परिस्थितीमध्ये जिल्ह्यात उपलब्ध असलेल्या पाण्याचे योग्य नियोजन करावे. त्याचप्रमाणे मागणीनुसार नागरिकांना पाण्याचे टँकर मंजूर करावेत.

 कुंटे यांनी चारा छावणी सुरू करणाऱ्या ग्रामविकास फाउंडेशनच्या सदस्यांसोबत चर्चा केली. छावणीत दाखल होणाऱ्या जनावरांचे टॅगिंग करण्याची सूचना देत त्यांनी पशुपालकांशी संवाद साधला. आजपर्यंत गुळवंच चारा छावणीत ८३ जनावरांची नोंद झाली. त्यात ७० मोठी, तर १३ लहान जनावरे असल्याची माहिती फांउडेशनच्या सदस्यांनी दिली. जिल्ह्यातील पर्जन्यमान, प्रकल्पातील पाणीसाठा, पाणीटंचाई निवारणार्थ कृती आराखडा, टँकर, विहिरींचे अधिग्रहण, पाणीपुरवठा, चारा छावणीबाबत प्रशासनातर्फे करण्यात आलेल्या उपाययोजनांविषयी कुंटे यांनी अधिकाऱ्यांशी चर्चा केली.

दरम्यान, कुंटे यांनी पाझर तलावाच्या दुरस्तीकामाचे, कुंदेवाडीतील देव नदीवरील नाला खोलीकरण, रुंदीकरण व साठवण बंधारे, डुबेरे गावातील सोपान पावसे यांच्या डांळिंब बागेतील मल्चिंग काम, आशापूर, टेंभूरवाडी येथील वॉटरकप फाउंडेशनच्या कामाची त्यांनी या वेळी पाहणी केली.