नाशिक येथे ‘कोरोना’ तपासणी प्रयोगशाळेचे काम अंतिम टप्प्यात 

नाशिक : मराठा विद्या प्रसारक समाज संस्थेच्या आडगाव येथील डॉ. वसंतराव पवार वैद्यकीय महाविद्यालयात सुरू होणाऱ्या ‘कोरोना’ तपासणी प्रयोगशाळेची पाहणी शनिवारी (ता. १८) महाराष्ट्र आरोग्य विज्ञान विद्यापीठाचे कुलगुरू डॉ. दिलीप म्हैसेकर व ‘मविप्र’च्या सरचिटणीस श्रीमती नीलिमाताई पवार व उपजिल्हाधिकारी कुमार आशिर्वाद यांनी केली असल्याची माहिती अधिष्ठाता डॉ. मृणाल पाटील यांनी दिली. 

जिल्ह्यात ‘कोरोना’ रुग्णांची संख्या वाढत असल्याने येथे तपासणी प्रयोगशाळेची मागणी होती. पालकमंत्री छगन भुजबळ यांनी आरोग्यमंत्री यांच्याकडे पाठपुरावा करून जिल्हा प्रशासनाला सूचना केल्या होत्या.  विधानसभा उपाध्यक्ष नरहरी झिरवाळ यांनी वैद्यकीय शिक्षणमंत्री अमित देशमुख यांच्याकडे मदत करण्याबाबत सूचविले होते. त्यानुसार श्री. देशमुख यांनी विद्यापीठाला सूचना केली होती. त्यामुळे सरकारने वैद्यकीय महाविद्यालय येथे तपासणी प्रयोगशाळेचा निर्णय घेतला असताना आता विद्यापीठाचे सहकार्य मिळणार आहे. 

सध्या प्रयोगशाळा उभारणीचे काम युद्धपातळीवर सुरू असून प्रयोगशाळा यंत्र सामुग्री व कामकाजाची माहिती डॉ. दिलीप म्हैसेकर, श्रीमती नीलिमाताई पवार, उपजिल्हाधिकारी कुमार आशिर्वाद, शिक्षणाधिकारी डॉ. नानासाहेब पाटील यांनी घेतली. 

यावेळी वैद्यकीय महाविद्यालयाच्या अधिष्ठाता डॉ. मृणाल पाटील, सूक्ष्मजीवशास्त्र विभागाच्या प्रमुख डॉ. नीता गांगुर्डे व दातार लॅबचे संचालक यांनी यंत्रसामुग्रीची माहिती दिली. कुलगुरू डॉ. म्हैसेकर यांनी युध्दपातळीवरील सुरू असलेल्या उभारणीच्या कामाचे समाधान व्यक्त केले.