crop insurance
crop insurance

पीकविम्याचे कामकाज या महिन्यात

राज्यातील शेतकऱ्यांना प्रधानमंत्री पीकविमा योजनेत सहभागी होण्याची प्रक्रिया जूनच्या दुसऱ्या आठवड्यापासून सुरू होण्याची शक्यता आहे.

पुणे: राज्यातील शेतकऱ्यांना प्रधानमंत्री पीकविमा योजनेत सहभागी होण्याची प्रक्रिया या (जून) महिन्यात सुरू होण्याची शक्यता आहे, अशी माहिती कृषी आयुक्तालयाच्या सूत्रांनी दिली. 

‘‘शेतकऱ्यांना वीमा सुविधा देणाऱ्या वीमा कंपन्या प्रथम निविदा भरतात. या निविदा मंजूर झाल्यानंतर राज्य शासनाने करार करते. सध्या निविदा प्रक्रियेचे काम सुरू आहे. प्रत्यक्षात शेतकऱ्यांना बँकेत वीमा हप्ता भरण्याची प्रक्रिया जूनच्या पहिल्या किंवा दुसऱ्या आठवड्यात सुरु होईल,’’ असे सूत्रांचे म्हणणे आहे. 

कृषी आयुक्तालयाच्या सांख्यिकी विभागाकडून पीकविमा योजनेच्या अटीशर्ती ठरविल्या जातात. मुख्य सांख्यिक उदय देशमुख यांच्याकडून या प्रक्रियेवर लवकरच अंतिम काम केले जाईल. त्यानंतर कृषी आयुक्त सुहास दिवसे व कृषी सचिव एकनाथ डवले यांच्या कडून कामकाजाचा आढावा घेतला जाईल. ‘‘वीमा कंपन्यांसोबत अंतिम करारनाम्यावर मुख्य सांख्यिक देशमुख व कृषी विस्तार संचालक नारायण शिसोदे यांच्या स्वाक्षऱ्या होतील,’’ अशी माहिती एका अधिकाऱ्याने दिली. 

दरम्यान, वीमा योजना आता ऐच्छिक राहील. त्यामुळे राज्य शासनाला यंदाच्या खरिपापासून नियमावलीत विविध बदल करावे लागणार आहेत. योजनेत सहभागी होणास इच्छुक नसल्याबद्दल शेतकऱ्याला आता घोषणापत्र देण्याची सुविधा मिळणार आहे. नोंदणीच्या आठवडाभर आधी तसे घोषणापत्र घ्यावे, असे आदेश केंद्राने दिले आहेत. 

केंद्राने बँकांना यंदा काही सूचना देत तंबी दिली आहे. कृषी आयुक्तालयाच्या सांख्यिकी विभागाने मात्र बॅंकासाठी यंदा काहीही नवीन सूचना नसल्याचे स्पष्ट केले आहे. ‘‘योजनेत सहभाग नसल्यास संबंधित शेतकऱ्याला फक्त घोषणापत्र बॅंकेत द्यावे लागेल. बाकी योजनेत काहीच बदल झालेला नाही,’’ असे मुख्य सांख्यिक श्री. देशमुख यांनी सांगितले.  पाच जिल्ह्यांची समस्या सुटली  पंतप्रधान पीकविमा योजनेतील विविध राज्यातील शेतकऱ्यांनी लॉकडाउनच्या काळात दाखल केलेले दावे फ्युचर जनरली इंडिया इन्शुरन्सतर्फे मान्य करण्यात आले. एकूण २७६ कोटींचे दावे मंजूर झाले असून त्यात अहमदनगर, बुलढाणा, नांदेड, सातारा, आणि यवतमाळ जिल्ह्यातील शेतकऱ्यांचा समावेश आहे. महाराष्ट्रातील २८ हजार ५९७ शेतकऱ्यांना २३ कोटी ९६ लाख रुपये देण्यात आले आहेत, असे कंपनीने स्पष्ट केले आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com