ग्रामीण भागात व्यवहार सुरळीत 

कोल्हापूर: चाळीस दिवसाच्या कडक संचारबंदीनंतर सोमवारपासून (ता.४) संचारबंदीमध्ये शिथीलता निर्माण केली आहे तरीदेखील काही दुकाने बंद आणि काही दुकाने सुरू असे चित्र शहरात होते. जिल्हा ऑरेंज झोन मध्ये आहे. रविवारी रात्री उशिरा जिल्हाधिकारी दौलत देसाई यांनी या बाबतच्या मार्गदर्शक सूचना जाहीर केल्या.  व्यापारी संकुले अथवा व्यापारी पेठांमध्ये एकाच वेळेस पाचपेक्षा अधिक दुकाने उघडता येणार नाहीत, अशी जाचक अट घातल्याचा फटका व्यापाऱ्यांना बसला आहे. त्यामुळे चाळीस दिवसाच्या संचारबंदीनंतर सोमवारी देखील अनेक दुकाने बंद राहिली. शहरातील चर्मकार लाईन, शिवाजी रोड, बिंदू चौक, लक्ष्मीपुरी व्यापारी पेठ, शाहूपुरी व्यापारी पेठ येथील अनेक दुकाने बंदच राहिली. जिल्ह्यातील बहुतांशी गावात नियमित व्यवहार सुरू झाले आहेत.  ग्रामीण भागातील बाजापेठा सकाळपासूनच गजबजलेल्या होत्या. काही भागात अजून ही संभ्रमावसस्था असल्याने काही दुकाने बंद होती. ग्रामपंचायत पातळीवर अनेक ठिकाणी स्थानिक व्यापाऱ्यांशी चर्चा करून व्यहवार सुरळीत करण्याबाबत निर्णय होत होते. कृषी निविष्ठा विक्री करणारी दुकाने अगोदरच सुरू आहेत. काही ठिकाणी बंद असलेले रस्ते ही सुरू करण्याचे प्रयत्न सुरू होते. परंतु लोकांची गर्दी होत असल्याने लोकांनी सुरक्षित अंतर ठेवून व्यवहार करण्याचे आवाहन करून सुद्धा अनेक ठिकाणी काटेकोर अंमलबजावणी होत नसल्याचे चित्र होते.