'यवतमाळची नजरअंदाजमधील पीक परिस्थिती अवास्तव'

यवतमाळ : खरिप हंगामात सप्टेंबर महिन्यापासून पावसाने दडी मारली. त्याचा फटका मूग, उडीद व सोयाबीन पिकांना बसला असतानाच जिल्ह्याची नजरअंदाज आणेवारी ६५ पैसे जाहीर करण्यात आली आहे. सुधारित व अंतिम पैसेवारी जाहीर होणार असली, तरी नजरअंदाजमध्ये गेल्यावर्षीच्या तुलनेत पीकपरिस्थिती चांगली दर्शविण्यात आली असून ती वास्तववादी नसल्याचा आरोप शेतकऱ्यांमधून होत आहे.

जिल्ह्यात दोन हजार १५९ गावे आहेत. त्यातील दोन हजार ४८ गावांची पैसेवारी ५० पेक्षा जास्त आहे. या गावांची पैसेवारी सोमवारी (ता.१) जाहीर करण्यात आली. जिल्ह्यात यंदा समाधानकारक पाऊस झाला असला तरी मध्यंतरी पावसाने घेतलेल्या विश्रांतीमुळे उडीद, मूग संकटात सापडले. पाऊस नसल्याने यंदा सोयाबिनच्या उत्पादनात ४० ते ५० टक्‍के घट होण्याची शक्‍यता आहे. त्यापूर्वी पिकावर कीडरोगाचा प्रादुर्भाव झाल्याने त्याचाही फटका पिकांना बसण्याचा अंदाज आहे. अशा स्थितीतही पैसेवारी ६५ आल्याने शेतकऱ्यांनी आश्‍चर्य व्यक्‍त केले आहे.

उडीद, मूग, सोयाबीनच्या उत्पादनात घट, कापसावर बोंडअळीचे संकट, तर तूर हातात येईपर्यंत काय होते? या विवंचनेत शेतकरी आहेत.

तालुकानिहाय पैसेवारी

यवतमाळ ६३, कळंब ७२, बाभूळगाव ७३, आर्णी ६५,  दारव्हा ६०, दिग्रस ६१, नेर ६१, पुसद ६१, उमरखेड ६६, महागाव ६२, केळापूर ६५, घाटंजी ६५, राळेगाव ७०,     वणी ६५, मारेगाव ६७, झरीजामणी ६२