यंदाचा टोमॅटो हंगाम पडणार लांबणीवर

नाशिक  : लांबलेल्या मॉन्सूनचे आगमन उशिरा झाले, त्यात काही शेतकऱ्यांनी हंगामपूर्व लागवडी केल्या. त्यात मुसळधार पाऊस झाल्याने व अधिक दिवस विसावल्याने यंदाचा टोमॅटो हंगाम लांबणीवर पडणार आहे. तसेच टोमॅटो पीकवाढीवर व उत्पादनावर परिणाम होणार असल्याची परिस्थिती निर्माण झाली आहे.  ऑगस्ट महिन्याच्या सुरुवातीला नाशिक जिल्ह्यात सर्वदूर पाऊस झाला. या पावसाचा जोर दुसऱ्या आठवड्यापर्यंत टिकून होता. सुरुवातीला जुलै महिन्याच्या अखेरच्या आठवड्यापर्यंत साधारण २५ ते ३० टक्के लागवडी झाल्या आहेत. मात्र, ऑगस्टच्या सुरुवातीला नागपंचमीच्या दरम्यान होणाऱ्या लागवडी मुसळधार पावसामुळे पुढे ढकलल्या आहेत. त्यामुळे दोन आठवडे उशिरा हंगाम सुरू होणार आहे. जीवणूजन्य करपा व मूळकूज यामुळे मरतुक वाढली होती. झालेल्या मुसळधार पावसामुळे शेतात पाणी साचून राहिल्याने रोपांची मोठ्या प्रमाणावर मरतुक झाली. तर लागवडी उशिरा झाल्या. त्यामुळे सध्या पिकाच्या वाढीवर परिणाम दिसून येत असून गेरवा व करपा रोगाचा प्रादुर्भाव झाल्याने मोठा परिणाम दिसून येत असल्याचे टोमॅटो शेतकरी उत्पादकांना रोगाच्या नियंत्रणासाठी उत्पादन खर्च वाढला असून यंदा हंगाम खर्चिक ठरणार आहे. त्यात उतपादन घटण्याची शक्यता नाकारता येत नाही. त्यामुळे बाजारभाव टिकून राहतील असे उत्पादक सांगतात.