येवला बाजार समितीचा ‘अंनिस’कडून गौरव

येवला, जि. नाशिक : ६४ वर्षांची परंपरा मोडीत काढत अमावास्येच्या दिवशी शेतीमाल खरेदी सुरू करण्याचा निर्णय स्तुत्य व अभिनंदनीय असल्याने येथील कृषी उत्पन्न बाजार समितीचे मुख्य प्रशासक वसंत पवार व सचिव कैलाश व्यापारे यांचा येथील अंधश्रद्धा निर्मूलन समितीच्या वतीने बाजार समितीत जाऊन सत्कार करण्यात आला. 

अमावास्या आली की बाजार समिती बंद ही अंधश्रद्धेला खतपाणी घालणारी परंपरा मोडण्याचे धाडस केल्याने शेतकरी हित साधले जाणार असल्याचे या वेळी राष्ट्र सेवा दलाचे प्रदेशाध्यक्ष अर्जुन कोकाटे यांनी स्पष्ट केले. सभापती पवार व सचिव व्यापारे यांनी व्यापारी बंधूंसोबत चर्चा करून मोठ्या धाडसाने हा निर्णय सकारात्मक दृष्टिकोन ठेवून घेतलेला आहे. परंतु या निर्णयामुळे शेतकरी बांधवांमध्ये अमावास्येबाबत हजारो वर्षांपासून रुजलेली अंधश्रद्धा, भीती दूर सारण्याचे मोठे काम बाजार समितीने केले आहे. 

मुख्य प्रशासक पवार, सचिव व्यापारे यांचा अंधश्रद्धा निर्मूलनचे अर्जुन कोकाटे, प्राचार्य डॉ. भाऊसाहेब गमे, दिनकर दाणे, डॉ. अजय विभांडिक, अॅड. दिलीप कुलकर्णी, पंडित मढवई, बाबासाहेब कोकाटे, रामनाथ पाटील, कानिफनाथ मढवई, अप्पासाहेब शिंदे, हेमंत पाटील, शैलेश अहिरे आदींनी शाल व पुष्पहार घालून सत्कार केला.