सुर्डीतील तरुणांनी तेरा पाझर तलावांना फुटण्यापासून वाचवले

वैराग, जि. सोलापूर ः ‘वॉटर कप’ स्पर्धेत राज्यात प्रथम आलेल्या सुर्डी (ता. बार्शी ) शेत -शिवारात गेल्या बुधवारी (ता.१४) अतिवृष्टी झाली. त्यामुळे गावावर संकट ओढवले होते. दरम्यान, येथील तरुणांनी सलग पंधरा तासांचे श्रमदान करत तेरा पाझर तलाव फुटण्यापासून वाचवले. त्यांच्या या श्रमदानाच्या कामाचे कौतुक होत आहे. यंदाच्या हंगामातील परतीच्या पावसाने बार्शी तालुक्यामध्ये रुद्र रूप धारण केले होता. १४ ऑक्टोबर रोजी दिवसभर झालेल्या अतिवृष्टीमुळे शहर आणि तालुक्यांमध्ये पाण्याने प्रचंड हाहाकार माजविला. या अतिवृष्टीमध्ये गावांतील १३ पाझर तलावांना धोका निर्माण झाला आणि पाण्याची गळती होऊ लागली. या सर्वच तलावांमध्ये पाण्याचे प्रमाण जास्त झाले होते. पाणी जास्त झाल्याने आणि सांडव्याचे मार्गही पूर्ण क्षमतेने वाहत असल्याने तलावाच्या भरावावरून पाणी ओव्हर फ्लो होण्यास सुरवात झाली होती. प्रा. मधुकर डोईफोडे यांच्या मार्गदर्शनाखाली गावातील तरुण संतोष लोहार, बाबासाहेब डोईफोडे, अजित शेळके, विलास शेळके, केशव शेळके, अप्पा शेळके, रघुनाथ शेळके, आनंद कापसे, हिरोजी शेळके, बाजीराव शेळके, बालाजी शेळके, राहुल शेळके, महादेव शेळके आदींनी या सर्वच पाझर तलावांची गळती थांबवण्यात यश मिळवले.